નર્મદામાં રેતી ખનના મુદ્દે તટવાસીઓમાં ભારે આક્રોશ,કરજણના MLAના પુત્ર અને ગ્રામજનો સામસામે આવી ગયા

વડોદરાઃ નર્મદા નદીના વિશાળ પટમાં નારેશ્વર સહિતના સ્થળોએ આડેધડ થતા રેતીખનનનો વિવાદ ઘેરો બનતો જાય છે અને રેતી ખનન કરતા તત્વો અને ગ્રામજનો વચ્ચે વિખવાદ થતો હોવાના બનાવો બનતા હોય છે.આજે ઝઘડિયા ખાતે આ મુદ્દે ભાજપના કરજણના ધારાસભ્યના પુત્ર અને ગ્રામજનો સામસામે આવી ગયા હોવાનો બનાવ ચર્ચાનો મુદ્દો બન્યો હતો.

બનાવ અંગે ઇન્દોર ગામના અગ્રણી દશરથભાઇ ઠાકોરે જણાવ્યું છે કે,આજે સવારે કરજણના ભાજપના ધારાસભ્યનો પુત્ર ષિ અક્ષય પટેલ તેના સાગરીતો લઇને મારી પાસે આવ્યો હતો અને તેણે કહ્યું હતું કે,હું ધારાસભ્યનો પુત્ર છું અને નદીમાં જેમ ફાવે તેમ  રેતી ખોદીશ. જ્યાં રજુઆત કરવી હોય ત્યાં કરજો.તેણે કેટલાક લોકો પર હુમલો  પણ કર્યો હતો અને જાનથી મારી નાંખવાની ધમકી પણ આપી હતી.

દશરથભાઇએ આક્ષેપ કર્યો છે કે,ભરૃચના ખાણ ખનિજ વિભાગના અધિકારીઓ પણ રેતી ખનનમાં સામેલ હોય તેમ લાગે છે.ગ્રામજનોએ પણ આરોપ લગાવ્યો હતો કે,અહીં કોઇ લીઝ નથી છતાં ખાણ ખનીજ વિભાગની રહેમ નજરથી બધું બેરોકટોક ચાલી રહ્યું છે.

ઇન્દોરના સરપંચ હસમુખભાઇ વસાવાએ જણાવ્યું હતુંકે,અમે ધારાસભ્યના પુત્રને અગાઉ પણ આ વિસ્તારમાં રેતીખનન નહિં કરવા કહ્યું હતું.આમ છતાં રેતી ખોદવામાં આવી રહી છે.ઉપરોક્ત બનાવમાં વડોદરા જિલ્લાની પોલીસ ઈન્દોરના કિનારા તરફ આવી ગઈ હતી પરંતુ હદ ઝઘડિયાની હોવાથી પોલીસે કોઇ ખાસ ભૂમિકા ભજવી નહતી.જોકે ઉપરોક્ત બનાવમાં કોઇ ફરિયાદ કરવામાં આવી નથી.