હરણી બોટ દુર્ઘટનાના 3 ભાગીદાર સહિત 6 આરોપીઓ વધુ 6 દિવસના રિમાન્ડ પર

વડોદરા : હરણી તળાવમાં લેક ઝોનમાં બોટ ઊંધી વળી જવાની દુર્ઘટનામાં ન્યુ સનરાઇઝ શાળાના ૧૨ બાળકો, એક શિક્ષિકા અને એક મહિલા સુપરવાઇઝર સહિત ૧૪ના મોત થયા છે. આ દુર્ઘટના માટે જવાબદાર ૧૮ આરોપીઓ સામે હરણી પોલીસ સ્ટેશનમાં ગુનો નોંધાયો છે. જે પૈકી અગાઉ પકડાયેલા ૬ આરોપીઓના પાંચ દિવસના રિમાન્ડ પુરા થતા આજે પોલીસે કોર્ટમાં રજૂ કરીને વધુ ૧૦ દિવસના રિમાન્ડની માગ કરી હતી જેની સામે કોટ ૬ દિવસના રિમાન્ડ મંજૂર કર્યા છે.

બિનિત કોટિયા, પરેશ શાહ અને ગોપાલ શાહની ધરપકડ બાદ હવેે 6 આરોપીઓનું  ક્રોસ ઇન્ટરોગેશન કરાશે

આ કેસમાં અન્ય મુખ્ય આરોપીઓ પૈકી પરેશ શાહ અને ગોપાલ શાહની ધરપકડ કરવામાં આવી છે. બિનિત કોટિયાની પણ ધરપકડ થઇ ચુકી છે એટલા મુખ્ય સૂત્રધારો સાથે ૬ આરોપીઓ સંલગ્ન હોવાથી તેમને સાથે રાખીને અને પચી ક્રોસ ઇન્ટરોગેશન કરવાનું બાકી છે. નહી પકડાયેલ આરોપી નિલેશ જૈનના સંપર્કો અને ઠેકાણાઓ અંગે પણ આ આરોપીઓને જાણકારી છે એટલે તે અંગે પણ હજુ પુછપરછ બાકી છે.  આ કેસમાં આજે સરકારી વકીલ અનિલ દેસાઇએ મુદ્દાસર અને ધારદાર રજૂઆત કરતા કોર્ટે ૬ આરોપીઓને વધુ ૬ દિવસ માટે પોલીસ રિમાન્ડ પર મોકલી આપ્યા હતા.

બોટકાંડનો સૂત્રધાર પરેશ કોર્પોરેશનની ટિકિટ મળવાની છે તેવી શેખી મારતો હતો

હરણીની બોટ દુર્ઘટનાનો મુખ્ય સૂત્રધાર પરેશ શાહ ભાજપના આગેવાનો સાથે ઘરોબો ધરાવે છે તે વાત કોઇથી અજાણી નથી. 

રાજકિય વર્તુળોમાં પરેશ શાહ એવી પણ શેખી મારતો હતો કે આગામી ચૂંટણીમાં મને ભાજપ ટિકિટ આપવાનું છે અને કોર્પેરેટર બનવાનો છું.