વડોદરામાં GUJCTOC હેઠળ પકડાયેલી બિચ્છુ ગેંગના અસલમ બોડિયો અને મુન્ના તડબૂચની 2 કરોડની મિલકત જપ્ત

Updated: Sep 23rd, 2024

‌

વડોદરામાં GUJCTOC હેઠળ પકડાયેલી બિચ્છુ ગેંગના અસલમ બોડિયો અને મુન્ના તડબૂચની 2 કરોડની મિલકત જપ્ત 1 - image

વડોદરાઃવડોદરામાં ગુજસીટોક હેઠળ પકડાયેલી બિચ્છુ ગેંગના સૂત્રધાર અસલમ બોડિયા અને તેના સાગરીત મુન્ના તડબૂચની મિલકતો ટાંચમાં લેવામાં આવી છે.

ગુજરાત સરકારે ઓર્ગેનાઇઝ ક્રાઇમ કંટ્રોલમાં લેવા માટે ગુજરાત આંતકવાદ અને સંગઠિત ગુના નિયંત્રણ અધિનિયમ-૨૦૧૫ ને મંજૂરી આપતાં વડોદરા પોલીસે ગુજસીટોકનો બિચ્છુ ગેંગ સામે વડોદરામાં પહેલો ગુનો નોંધ્યો હતો.જે અંતર્ગત જમીન, મકાન,મિલકત પચાવી પાડવા માટે આર્થિક લાભ ખાતર નાણાંની લેતીદેતી કરવાના આરોપસર બિચ્છુ ગેંગના સૂત્રધાર અસલમ હૈદરમીયા શેખ ઉર્ફે અસલમ બોડીયો તેમજ તેના સાગરીત મહંમદ હુસેન ઉર્ફે મુન્ના તડબૂચ જાકીરહુસેન શેખ(બંને રહે.નવાપુરા,મહેબૂબ પુરા)સહિત કુલ ૨૬ સાગરીતોની ધરપકડ કરવામાં આવી હતી.હાલમાં અસલમ બોડીયો જ્યુડિશિયલ કસ્ટડીમાં છે.

આવતીકાલે વડોદરામાં ગુજરાત પોલીસના ઉચ્ચ અધિકારીઓની પહેલીવાર ક્રાઇમ કોન્ફરન્સ મળી રહી છે ત્યારે વડોદરા ક્રાઇમ બ્રાન્ચે ગુજસીટોક ના વર્ષ-૨૦૨૧માં નોંધેલા ગુના અંગેની કામગીરીની વિગતો જાહેર કરી છે.

ક્રાઇમ બ્રાન્ચના ઇન્ચાર્જ ડીસીપી એચ એ રાઠોડે કહ્યું છે કે,બિચ્છુ ગેંગ દ્વારા ગેરકાયદે મેળવેલા નાણાંમાંથી ખરીદેલી મિલકતો ટાંચમાં લેવામાં આવી રહી છે.જે મુજબ અસલમ બોડીયાનો તહુરાપાર્ક-૧,તાંદલજા ખાતેનો રૃ.૪૪.૭૫ લાખની કિંમતના ફ્લેટ સહિત કુલ રૃ.૬૯.૮૮ લાખની મિલકત ટાંચમાં લીધી છે.

જ્યારે,મુન્ના તડબૂચની ડભોઇરોડ દિવાળીપુરા ખાતે આવેલી બાંધકામની સાઇટ તેમજ ફાર્મ હાઉસ સહિત કુલ રૃ.૧.૩૨ કરોડની મિલકત ટાંચમાં લેવામાં આવી છે.

વડોદરામાં GUJCTOC હેઠળ પકડાયેલી બિચ્છુ ગેંગના અસલમ બોડિયો અને મુન્ના તડબૂચની 2 કરોડની મિલકત જપ્ત 2 - image મુન્ના તડબૂચની ટાંચમાં લીધેલી મિલકતો