રાપરમાં નડતરરૂપ 40 કંતાનો દુર કરી સીસીટીવી કેમેરા ખુલ્લા કરાયા

રાપર પોલીસ અને નગરપાલિકાની સંયુક્ત કાર્યવાહી

દુકાનોની આગળની નડતરરૂપ સામાન ન ગોઠવવા વેપારીઓને તાકિદ, ઝુંબેશ દરમિયાન વાહન ચાલકો દંડાયા, ડીટેઈન સહિતની કામગીરી કરાઈ

રાપરમાં લાગેલા સીસીટીવી કેમેરાના રેકોર્ડમાં અડચણો સમાન મુખ્ય બજારોમાં વેપારીઓએ છાંયડો બનાવવા માટે કંતાનોની નડતરરૂપ આડશ આજે રાપર પોલીસ અને નગરપાલિકા દ્વારા સંયુક્ત રીતે ઝુંબેશ હાથ ધરી દુર કરવામાં આવી હતી. આ અંગે રાપર પીઆઇ જે.બી.બુબડીયા પીએસઆઇ પી.એલ.ફણેજા ચીફ ઓફિસર રવાજી જાડેજા ટ્રાફિક શાખાના મુકેશસિંંહ રાઠોડ નગરપાલિકાના ધર્મેન્દ્રસિંહ જાડેજા સહિત પોલીસ અને નગરપાલિકા ના કર્ર્મચારીઓએ કામગીરી હાથ ધરી હતી.  જેમાં નડતરરૂપ ચાલીસથી વધુ કંતાનો દુર કરવા મા આવ્યાં હતા તો ટ્રાફિક ને નડતર રૂપ વાહનો તથા વેપારી દ્વારા રોડ પર ગોઠવવામાં આવેલ સામાન ને નડતર રૂપ ન રાખવા ચેતવણી આપવામાં આવી હતી.

છ વર્ષથી લાગેલા સીસીટીવી કેમેરાને શરૂ કરવા માટે નગરપાલિકા દ્વારા રાજ્ય સરકાર પાસેથી ગ્રાન્ટ ફાળવવા માટે તજવીજ હાથ ધરવામાં આવી હોવાનું ચીફ ઓફિસર રવાજી જાડેજા એ જણાવ્યું હતું. તેમણે જણાવ્યું હતું કે જો હવે થી કોઈ પણ વેપારી દ્વારા સીસીટીવી કેમેરા ને નડતરરૂપ કંતાનો કે આડશ ઉભી કરશે તો આકરો દંડ ફટકારવામાં આવશે. આજે રાપર પોલીસ અને નગરપાલિકા દ્વારા સંયુક્ત કામગીરી દેના બેંક ચોક સલારી નાકા ભુતિયા કોઠા રોડ મેઈન બજાર માલી ચોક એસટી રોડ સહિતના વિસ્તારોમાં કામગીરી કરી હતી. ઝુંબેશ દરમ્યાન પોલીસ દ્વારા એન.સી૧૧ દ્વારા ૪૨૦૦/= નો દંડ ફટકાર્યો હતો અને ત્રણ વાહનો ડીઈટેન કરવામાં આવ્યા હતા. ઉપરાંત ૩૮ વાહનોનું ચેકીંગ હાથ ધરવામાં આવ્યું હતું. રાપર નગરપાલિકા અને પોલીસ દ્વારા રાપર શહેરમાં નડતરરૂપ કંતાનો દુર કરી સીસીટીવી કેમેરા ખુલ્લા કરવામાં આવ્યા હતા.