કાજીપુરા પાસે ત્રીપલ અકસ્માતમાં મહિલાનું મોત, 9 વ્યક્તિને ઈજા

- બાઈક અને બે કાર વચ્ચે અકસ્માત

- કાર ચાલકે બાઈકને પાછળથી ટક્કર મારતા બાઈક સામેથી આવતી ઈકો સાથે અથડાઈ 

ખેડા તાલુકાના પિંગલજ ઈન્દિરા નગરીમાં રહેતા અજીતભાઈ રમણભાઈ ખાંટ રક્ષાબંધનના દિવસે તેમના પત્ની ચેતનાબેન (ઉં.વ. ૩૫) સાથે બાઈક પર ખેડા ખરીદી કરવા જઈ રહ્યા હતા. ત્યારે કાજીપુરા ઓરેન્જ હોટલ નજીક પાછળથી આવતી કાર બાઈક સાથે અથડાઈ હતી. જેથી બાઈક સામેથી આવતી ઈકો કાર સાથે અથડાઈ હતી. 

જેથી બાઈક સવાર દંપતીને રોડ પર પટકાતા ગંભીર ઈજાઓ પહોંચી હતી. જેમાં ચેતનાબેનનું ઘટનાસ્થળ પર મોત નિપજ્યું હતું. જ્યારે ઈકોમાં સવાર હંસાબેન મહેશભાઈ નાઈ (રહે. નાયકા), મહેશકુમાર પરસોત્તમભાઈ નાઈ (રહે. ગોતા), દિપેશ ચંદ્રકાંત જાદવ, હિયાન દીપેશભાઈ જાદવ (બંને રહે. નિકોલ), ગીતાબેન અરવિંદભાઈ પરમાર, અરવિંદભાઈ અંબુભાઈ પરમાર, ગોવિંદભાઈ પરસોત્તમ પરમાર અને ભારતીબેન ગોવિંદભાઈ પરમાર (ચારેય રહે. ખાધલી)ને ઈજાઓ પહોંચી હતી. 

આ બનાવ અંગે રમણભાઈ નાથાભાઈ ખાંટની ફરિયાદના આધારે ખેડા ટાઉન પોલીસે ગાડી ચાલક સામે ગુનો નોંધી કાયદેસરની કાર્યવાહી હાથ ધરી છે.