શાળાના કમ્પાઉન્ડની જર્જરિત દીવાલ અને પાણીની ટાંકીથી અકસ્માતનું જોખમ

- ઠાસરાના બાધરપુરા ગામના વાલીઓમાં રોષ

- સરપંચની બેદરકારીથી કામ થતું નથી : મુખ્ય શિક્ષિકા રેલવેની હદના લીધે અમારે કશું કરવાનું થતું નથી : સરપંચ

ઠાસરા તાલુકાની બાધરપુરા પ્રાથમિક શાળામાં ૨૯૩ બાળકો અભ્યાસ કરી રહ્યા છે. શાળાના કમ્પાઉન્ડ પાસે ટાંકી અને કમ્પાઉન્ડ વોલ ઘણા સમયથી જર્જરિત અવસ્થામાં છે. ટાંકી તૂટી ગઈ હોવા છતાં ઉતારવાની કોઈ તજવીજ હાથ ધરવામાં આવી નથી. બધારપુરા શાળાના બાળકો આ ટાંકી અને કમ્પાઉન્ડ વોલના બાજુમાં રમે છે અને અવરજવર પણ કરી રહ્યા છે. શાળાના મુખ્ય શિક્ષિકા દ્વાર તમામ બાબતે તાલુકા પ્રાથમિક શિક્ષણ અધિકારીને લેખીત જાણ કરી છે. ઘણા સમયથી આવી જર્જરિત અવસ્થામાં ટાંકી અને કમ્પાઉન્ડ વોલ પડુંપડું થઈ રહી છે. ત્યારે મુખ્ય શિક્ષિકા આ બાબતે ગામના સરપંચની બેદરકારીના લીધે આ કામ થતું નથી તેવુ જણાવી રહ્યા છે. 

આ બાબતે સરપંચ કભાઈભાઈએ કહ્યું હતું કે, અગાઉના સરપંચે ટાંકી તોડવાનું કામ કરાવ્યું હતું. પરંતુ, કોઈ કારણસર કામ અધુરું મૂકી અને કોન્ટ્રાક્ટર ચાલ્યા ગયા છે.  અને મારે સરપંચ બને બે વર્ષ થયા છે પણ રેલવેની હદ શાળાના ગેટ સુધી મારી હોવાથી અમારે કશું કરવાનું રહેતું નથી. કારણ કે, જે ટાંકી અને કમ્પાઉન્ડ વોલની દીવાલ વહે ત્યાં જ આંગણવાડીનો ઓરડો અને શાળાના બે ઓરડા છે. તે પણ રેલવેની હદમાં આવે છે. એટલે હવે અમારે શાળા માટે પણ સરકારમાં દરખાસ્ત કરવાની ફરજ પડેલી છે. જ્યારે બાધરપુરાના વાલીઓમાં ભારે રોસ જોવા મળી રહયો છે. ક્યારેક આ જર્જરિત ટાંકી અથવા કમ્પાઉન્ડ વોલ પડી અને બાળકોને નુકશાન થયું તો તેના જવાબદાર કોણ તેવા પ્રશ્નો વાલીઓ કરી રહ્યા છે.