બોલેરો ગાડીની ટક્કરે બાઈક ચાલકનું મોત

- નરસંડા વડતાલ રોડ પર અકસ્માત

- પેટલાદના પોરડાના બે વ્યક્તિઓ નડિયાદથી દિવાળીની ખરીદી કરી પરત જતા હતા

પેટલાદ તાલુકાના પોરડામાં રહેતા અતુલભાઈ લક્ષ્મણભાઈ સોલંકી અને વિજયભાઈ જશભાઈ પરમાર બાઈક લઈને નડિયાદ બજારમાં દિવાળીની ખરીદી કરવા ગયા હતા. 

નડિયાદથી ખરીદી કરી તા.૨૫મીની રાત્રે પરત ઘરે ફરતી વખતે નરસંડાથી વડતાલ તરફ પુરોહિત કેટરર્સ પાસે સામેથી આવતી પીકપ બોલેરો ગાડી અથડાતા બાઈક સવાર બંને રોડ ઉપર પટકાયા હતા. જેથી બાઇક ચાલક અતુલભાઇ સોલંકીને માથામાં તેમજ શરીર પર ગંભીર ઇજા થતાં ૧૦૮ એમ્બ્યુલન્સમાં નડિયાદ સિવિલ હોસ્પિટલમાં સારવાર માટે લઈ જવામાં આવ્યા હતા. જ્યાં અતુલભાઇ સોલંકીનું મૃત્યુ નિપજ્યું હતું. 

આ બનાવ અંગે વિજયભાઈ જશભાઈ પરમારની ફરિયાદના આધારે વડતાલ પોલીસે બોલેરો ગાડીના ચાલક સામે ગુનો નોંધી કાયદેસર કાર્યવાહી હાથ ધરી હતી.