નડિયાદમાં સાયકલ સવાર વૃદ્ધનું અજાણ્યા વાહનની ટક્કરે મોત

- 'હિટ એન્ડ રન' નો વધુ એક બનાવ

- વસોના પીજ ગામે રહેતા વૃદ્ધ સવારે નોકરી જતા હતા ત્યારે બનાવ બન્યો

વસો તાલુકાના પીજમાં રહેતા શાંતિલાલ ઉર્ફે ભગાભાઈ મકવાણા આજે સવારે સાયકલ લઈને નડિયાદ નોકરી પર જવા નીકળ્યા હતા. તેઓ નડિયાદ પીજ રોડ રામદેવ મંદિર આગળથી પસાર થતા હતા. દરમિયાન પૂર ઝડપે હંકારી આવેલો અજાણ્યો વાહન ચાલક સાઇકલ સવારને ટક્કર મારી નાસી ગયો હતો. જેથી વાહનની અડફેટે આવી ગયેલા સાયકલ સવાર શાંતિલાલ મકવાણા (ઉંમર વર્ષ ૬૫)ને માથામાં તેમજ શરીર પર ગંભીર ઈજા થતાં સ્થાનિક લોકો દ્વારા ૧૦૮ મારફતે તેમને સારવાર માટે નડિયાદ સિવિલ હોસ્પિટલમાં લઈ જવામાં આવ્યા હતા. જ્યાં તેમને મૃત જાહેર કરવામાં આવ્યા હતા.  આ બનાવ અંગે મૃતકના પુત્ર ગૌરાંગ શાંતિલાલ મકવાણાએ નડિયાદ પશ્ચિમ પોલીસ મથકમાં ફરિયાદ નોંધાવતા પોલીસે ગુનો નોંધી કાયદેસર કાર્યવાહી હાથ ધરી હતી.