જામનગરમાં શંકર ટેકરી વિસ્તારમાં રહેતી મહિલા પર બાળક અંગેની તકરારમાં બે પાડોશીઓએ હુમલો કર્યો

જામનગર,તા.02 નવેમ્બર 2023,ગુરૂવાર

જામનગરના શંકર ટેકરી સિદ્ધાર્થ કોલોનીમાં રહેતી એક મહિલાએ પોતાના ઉપર હુમલો કરવા અંગે બે પાડોશીઓ સામે ફરિયાદ નોંધાવી છે. મહિલાનો બાળક આરોપીના બાઈક પર દાંડીયા પછાડતો હોવાથી તેના મનદુઃખના કારણે આ હુમલો કરાયાનું જાહેર થયું છે.

 આ બનાવની વિગત એવી છે કે જામનગરમાં શંકર ટેકરી સિદ્ધાર્થ કોલોની શેરી નંબર 18 માં રહેતી કુંદનબેન કિરણભાઈ ભીટોલ નામની મહિલાએ પોતાના ઉપર હુમલો કરી જાનથી મારી નાખવાની ધમકી આપવા અંગે પોતાના પાડોશમાં જ રહેતા નરેશ બાવજીભાઈ રાઠોડ અને સંજય દિનેશભાઈ રાઠોડ સામે ફરિયાદ નોંધાવી છે. 

ફરીયાદી મહિલાનો છ વર્ષનો બાળક સિદ્ધાર્થ આરોપીની મોટરસાયકલની ટાંકી પર દાંડિયા પછાડતો હતો, જે મામલે બંને પરિવાર વચ્ચે ઝઘડો થયો હતો. મહિલા દ્વારા વાહનમાં નુકસાનીનો ખર્ચ આપી દેવા છતાં પણ બંને આરોપીઓએ હુમલો કર્યાનું પોલીસમાં જાહેર થયું છે.