તારા ઘરના અમને દારૂ વેંચવાની કેમ ના પાડે છે? તેમ કહી જામનગરના નવાગામ ઘેડ વિસ્તારમાં યુવાનનો પગ ભાંગી નાખ્યો

image : Freepik

જામનગર,તા.14 ઓક્ટોબર 2023,શનિવાર

જામનગર શહેરના નવાગામ ઘેડ વિસ્તારમાં એક રિક્ષા ચાલક યુવાન પર તમારા ઘરના અમને દારૂ વેંચવાની કેમ ના પાડે છે? તેમ કહી એક મહિલા સહિત ચાર શખસોએ લોખંડના પાઈપ, ધોકા વડે હુમલો કરી અસ્થિભંગની ઈજાઓ પહોંચાડી હોવાનો બનાવ સીટી બી. ડીવીઝન પોલીસ મથકમાં નોંધાયો છે. 

પોલીસ સુત્રોએ જાહેર કરેલી વિગતો મુજબ જામનગર શહેરના નવાગામ ઘેડ વિસ્તારના જાસોલિયા સોસાયટીમાં રહેતા અમીરભાઈ અલ્લારખા સાટી નામનો 34 વર્ષિય રિક્ષા ડ્રાઈવર ગત તા.30-09-2023ના રોજ રાત્રિના સવા આઠ વાગ્યાના અરસામાં તેમના પાટલા સાસુ હસીનાબેનના ઘરે ધાર્મિક પ્રસંગે હાજરી આપવા જતો હતો, તે દરમિયાન નવાગામ સ્કૂલ પાસે યુવરાજસિંહ વિક્રમસિંહ જાડેજાના ઘર પાસેથી પસાર થઈ રહ્યા હતા, ત્યારે યુવરાજસિંહે તેને રોકીને કહેલું કે તારા ઘરના અમને દારૂ વેંચવાની કેમ ના પાડે છે? તેમ કહી ઝઘડો કરી યુવરાજસિંહે લોખંડના પાઈપથી જમણા પગમાં એક ઘા માર્યો હતો. અને યુવરાજસિંહ માતા સજજનબા તથા યુવરાજસિંહના મોટા ભાઈ કિરીટસિંહ અને તેના મામા જુવાનસિંહે લાકડાના ધોકા અને લોખંડના પાઈપ વડે આડેધડ માર મારતાં માણસો ભેગાઈ થઈ જતાં ત્યાંથી ભાગી ગયા હતા.

 ત્યાર બાદ ઘવાયેલા આમીરભાઈને સારવાર અર્થે સરકારી હોસ્પિટલમાં ખસેડવામાં આવ્યા પછી તેને અસ્થિભંગની ઈજાઓ થવાથી સારવાર આપ્યા બાદ રજા આપવામાં આવતાં તેણે સીટી બી. ડીવીઝન પોલીસ મથકમાં ઉપરોકત ચારેય શખ્સો વિરૂદ્ધ ફરિયાદ નોંધાવી હતી. પોલીસે ફરિયાદ નોંધી ચારેય શખ્સોને પકડી પાડવા ચક્રો ગતિમાન કર્યા છે.