જામનગરમાં રીક્ષાનું હોર્ન વગાડવા જેવી સામાન્ય બાબતમાં શાકભાજીની લારીવાળાનો છરી વડે હુમલો

Jamnagar Crime News : જામનગરમાં શાકમાર્કેટ વિસ્તારમાં રિક્ષાનું હોર્ન વગાડવા જેવી સામાન્ય બાબતમાં ઉશ્કેરાયેલા શાકભાજીની રેકડીના ચાલકે રીક્ષા ચાલક અને તેના પિતરાઈ ભાઈ ઉપર હુમલો કરી દઇ ઇજા પહોંચાડ્યાની ફરિયાદ પોલીસમાં નોંધાવવામાં આવી છે.

આ ફરિયાદ અંગેના બનાવની વિગત એવી છે કે જામનગરમાં રાધિકા સ્કૂલ પાસે રહેતા અને વેપાર કરતા જલ્પેશ દિનેશભાઈ નકુમ નામના વેપારી યુવાન ગઈકાલે શાકમાર્કેટ વિસ્તારમાં શાકભાજીની ખરીદી કરવા માટે આવ્યા હતાં, અને પોતાના ભાઈ ઉમેદભાઈ નકુમ નામના પિતરાઈ ભાઈની રિક્ષામાં બેસીને ઘર તરફ જઈ રહ્યા હતા.

જે દરમિયાન રેકડી ચાલક અવેશ હનીફભાઈ શેખ રસ્તા પર આડેથી રેંકડી સાથે ઉભો હોવાથી રીક્ષા ચાલકે હોર્ન વગાડી તેની રેકડી એક તરફ ખસેડવા માટે કહ્યું હતું. જે રીક્ષા ચાલક અવેશને પસંદ પડ્યું ન હતું, આથી તેણે રીક્ષા ચાલક ઉમેદભાઈ સાથે ઝપાઝપી કરી હતી.

જે દરમિયાન પાછળ બેઠેલા તેના પિતરાઈ ભાઈ જલ્પેશભાઈએ છોડાવવા માટે વચ્ચે પડતાં તેના હાથમાં છરી વડે હુમલો કરી દીધો હતો. જેથી સમગ્ર મામલો સીટી એ. ડિવિઝન પોલીસ મથકમાં લઈ જવાયો હતો અને બંને પિતરાઈ ભાઈઓ પર હુમલો કરવા અંગે રીક્ષા ચાલક અવેસ હનીફભાઈ શેખ સામે પોલીસ ફરિયાદ નોંધાવાઈ છે.