જામનગર શહેરમાં બે રહેણાંક મકાનમાં આગની ઘટનાથી દોડધામ : ફાયરે આગ બુજાવી

Jamnagar Fire in House : જામનગરમાં મચ્છર નગર તેમજ હાટકેશ્વર સોસાયટી વિસ્તારમાં આવેલા બે મકાનમાં રાંધણ ગેસનો બાટલો લીક થવાથી તેમજ ચીમનીમાં આગ લાગવાથી દોડધામ થઈ હતી. ફાયર બ્રિગેડની ટુકડીએ બંને સ્થળે દોડી જઈ આગને કાબુમાં લઈ લીધી હતી.

આગનો પ્રથમ બનાવ જામનગરના મચ્છર નગર નજીક શાંતિનગર શેરી નંબર સાતમાં બન્યો હતો. ત્યાં રહેતા રાજુભા ભીખુભાઈ જાડેજાના મકાનમાં રાંધણ ગેસનો બાટલો વહેલી સવારે લીક થયો હતો, જેથી આગનું છમકલું થયું હતું, અને ઘરવખરી સળગવા લાગી હતી. ફાયર બ્રિગેડને આ બનાવની જાણ કરાતાં ફાયર શાખાની ટુકડી તુરત ઘટના સ્થળે દોડી ગઈ હતી, અને આગને કાબૂમા લઇ રાંધણ ગેસનો બાટલો સહી સલામત રીતે બહાર ખેંચી લીધો હતો, જેથી સમગ્ર પરિવારજનોએ હાશકારો અનુભવ્યો હતો.

આગનો બીજો બનાવ હાટકેશ્વર સોસાયટીમાં રહેતા મલયભાઈ સોમાણીના મકાનમાં બન્યો હતો. ત્યાં રસોડામાં લગાવેલી ચીમનીમાં અકસ્માતે આગ લાગી હતી. જે બનાવની જાણકારી મળતા ફાયર શાખા ની ટિમ તુરતજ ઘટના સ્થળે દોડી ગઈ હતી, અને પાણીનો મારો ચલાવીને આગને કાબુમાં લઈ લીધી હતી.