જામનગર નજીક મોખાણા ગામ પાસે અજાણ્યા ફોરવ્હીલના ચાલકે બાઈકને ઠોકરે ચડાવતાં ગોજારો અકસ્માત , એકનું મૃત્યુ

Accident in Jamnagar : જામનગર નજીક મોખાણા ગામના પાટીયા પાસે બાઈક અને કાર વચ્ચે અકસ્માત સર્જાયો હતો. જે અકસ્માતમાં બાઈક સવાર મોરકંડા ગામના મામા ભાણેજ ઇજાગ્રસ્ત બન્યા પછી ભાણેજનું સારવાર દરમિયાન મૃત્યુ નીપજ્યું છે, જ્યારે મામા સારવાર હેઠળ છે.

 આ અકસ્માતના બનાવની વિગત એવી છે કે જામનગર તાલુકાના મોરકંડા ગામમાં રહેતા અને છૂટક મજૂરી કામ કરતા રાજેશભાઈ દિલીપભાઈ પરમાર (35) કે જેઓ પોતાના ભાણેજ મનીષભાઈને બાઈકમાં પાછળ બેસાડીને મોખાણા ગામના પાટીયા પાસેથી પસાર થઈ રહ્યા હતા.

 જે દરમિયાન સામેથી પુરઝડપે આવી રહેલા કોઈ અજ્ઞાત ફોરવ્હીલના ચાલકે બાઈકને ઠોકરે ચડાવતાં અકસ્માત સર્જાયો હતો. જે અકસ્માતમાં મામા-ભાણેજ બંને ઇજાગ્રસ્ત બન્યા હતા, અને બંનેને સારવાર માટે જામનગરની જી.જી.હોસ્પિટલમાં ખસેડાયા હતા. જયાં ભાણેજ મનીષનું સારવાર મળે તે પહેલાં જ મૃત્યુ નીપજયું હતું, જ્યારે રાજેશ દિલીપભાઈ પરમારને સારવાર અપાઈ રહી છે.

 આ અકસ્માતના બનાવ અંગે અજાણ્યા કાર ચાલક સામે ફરિયાદ નોંધાવતા પ્રોબેશનલ આઇપીએસ અજય કુમાર મિણાએ સમગ્ર મામલે તપાસ હાથ ધરી છે.