જામનગરમાં ગેરેજ સંચાલક પર પાડોશીએ ઇંટ વડે હુમલો કરી માથું ફોડ્યું, પોલીસ ફરિયાદ દાખલ

Jamnagar Crime News : જામનગરમાં શરૂ સેક્શન રોડ પર ગેરેજ ચલાવતા એક યુવાન પર તેની પાડોશમાંજ રહેતા એક શખ્સે માથામાં ઇંટ ફટકારી માથું ફોડયાની ફરિયાદ પોલીસમાં નોંધાવાઈ છે. ઘરની બાજુમાં જ ખોલેલું ગેરેજ પસંદ ન હોવાથી આ કૃત્ય કરાયું હોવાનું પોલીસમાં જાહેર થયું છે.

 આ બનાવની વિગત એવી છે કે જામનગરમાં પટેલ કોલોની શેરી નંબર 9 માં રહેતા અને શરૂ સેક્શન રોડ પર મહાદેવ મોટર્સ ગેરેજ ચલાવતા હાર્દિકભાઈ પ્રવીણભાઈ અજમેરિયાએ પોતાને ગાળો ભાંડી જાનથી મારી નાખવાની ધમકી આપવા અંગે તેમજ પોતાના ભાઈ મયુરભાઈ પર માથામાં ઇંટ ફટકારી માથું ફોડી નાખવા અંગે પાડોશમાં જ રહેતા જીગ્નેશ વિઠલાણી નામના શખ્સ સામે ફરિયાદ નોંધાવી છે.

 પોલીસ ફરિયાદમાં જાહેર કરાયા અનુસાર આરોપી જીગ્નેશની બાજુમાં જ ફરિયાદી અને તેના ભાઈએ ગેરેજ ખોલ્યું હોવાથી તે પસંદ નહીં હોવાના કારણે આ હુમલો કરાયાનું જાહેર થયું છે. જે મામલે પોલીસ વધુ તપાસ ચલાવે છે.