જામનગર-રાજકોટ ધોરી માર્ગ પર રસ્તે રઝળતા ખૂંટીયાએ વધુ એક માનવીનો ભોગ લીધો

- રાજકોટના વેપારીને જાંબુડા પાટીયા પાસે બાઈકની આડે ખૂંટિયો ઉતરતાં ઇજાગ્રસ્ત બન્યા પછી અપમૃત્યુ

જામનગર,તા.6 ડિસેમ્બર 2023,બુધવાર

જામનગર-રાજકોટ ધોરી માર્ગ પર વધુ એક રસ્તે રઝળતા ખૂંટિયાએ માનવીનો ભોગ લીધો છે. રાજકોટના એક વેપારી બાઈક લઈને જામનગર આવતા હતા, દરમિયાન જાંબુડા પાટીયા પાસે ખૂંટિયો આડો ઉતરતાં ઇજાગ્રસ્તો બન્યા પછી અપમૃત્યુ થયું છે.

 આ બનાવની વિગત એવી છે કે રાજકોટમાં મોરબી રોડ પર સેટેલાઈટ ચોકમાં સવન એવન્યુમાં રહેતા હિતેશભાઈ પ્રભુદાસભાઈ ઉમરાણીયા નામના 38 વર્ષના વેપારી ગત 29.6.2023 ના દિવસે પોતાનું બાઈક લઈને વેપારના કામ અર્થે રાજકોટ થી જામનગર આવી રહ્યા હતા. જે દરમિયાન જાંબુડા ગામના પાટીયા પાસે તેઓના બાઈકની આડે ખૂંટિયો ઉતરતાં બાઈક ફંગોળાયું હતું, અને તેઓને હેમરેજ સહિતની ગંભીર ઇજા થઈ હતી.

 જેથી વેપારીને સારવાર માટે રાજકોટની ખાનગી હોસ્પિટલમાં અને ત્યારબાદ સિવિલ હોસ્પિટલમાં ખસેડવામાં આવ્યા હતા. જ્યાં લાંબી સારવાર પછી ગઈકાલે તેઓનું મૃત્યુ નીપજયું છે. મૃતક વેપારી રાજકોટમાં બેઠક રોડ પર હાર્ડવેરની દુકાન ધરાવતા હતા. અને તે દુકાનના કામ અર્થે જામનગર આવતી વખતે આ અકસ્માત નડ્યો હોવાનું જાહેર થયું છે.