જામનગરમાં મહાદેવ નગરમાં રહેણાક મકાનમાં ચાલતી મીની કલબ પર એલસીબીનો દરોડો , 9 આરોપીઓ અટકાયત

Gambling News Jamangar : જામનગરમાં મહાદેવ નગર વિસ્તારમાં રહેતા એક મકાનમાં ચાલતી ઘોડીપાસાની મીની કલબ ઉપર ગઈ મોડી રાત્રે એલસીબીની ટુકડીએ દરોડો પાડયો હતો, અને મકાન માલિક સહિત 9 શખ્સોની અટકાયત કરી લઇ રોકડ રકમ-મોબાઈલ ફોન અને વાહનો સહિત રૂપિયા સવા બાર લાખની માલમતા કબજે કરી લેવામાં આવી છે.

આ દરોડાની વિગત એવી છે કે જામનગરમાં મહાદેવ નગર વિસ્તારમાં રહેતો લાખાભાઈ દલુભાઈ ધારાણી નામનો શખ્સ પોતાના રહેણાંક મકાનમાં ઘોડીપાસાની મીની કલબ ચલાવે છે. અને શહેરના આસપાસના વિસ્તારના જુગારીયા તત્વો એકત્ર થઈને જુગાર રમવા આવે છે. જે ચોક્કસ બાતમીના આધારે મોડી રાત્રે એલસીબીની ટુકડીએ દરોડો પાડયો હતો. જે દરોડા દરમિયાન મકાન માલિક સહિત નવ શખ્સો ઘોડીપાસા વડે જુગાર રમી રહેલા મળી આવ્યા હતા.

આથી પોલીસે મકાન માલિક લાખાભાઈ ધારાણી ઉપરાંત સતીશ હરીશભાઈ મંગેઝ હેમંતભાઈ અમલભાઈ ગંઢા, યાસીન ઇબ્રાહીમભાઇ સંધિ, સાજણ નાથાભાઈ ગઢવી, ડાડુભાઇ કરણાભાઈ ભાટીયા, કચરાભાઈ લગધીરભાઈ ગઢવી અને બીપીન સોમાભાઈ ચાવડાની અટકાયત કરી લઈ તેઓ પાસેથી રૂપિયા 1,53,000 ની રોકડ રકમ, આઠ નંગ મોબાઈલ ફોન, કાર અને બાઈક સહિત કુલ રૂપિયા 12,24,500 ની માલમતા કબજે કરી છે.