જામનગરમાં નવરાત્રિમાં ફૂડ સેફ્ટીને લઈને પાલિકાની ફુડ શાખા એલર્ટ : 3 થી 17 ઓક્ટોબર દરમિયાન ફૂડ સેફ્ટી ડ્રાઈવનું આયોજન

Jamnagar Food Safety Drive : જામનગર સહિત સમગ્ર રાજ્યમાં નવરાત્રિની તહેવારોની તૈયારીઓ જોરશોરથી ચાલી રહી છે. શહેરના વિવિધ સ્થળોએ ગરબાના આયોજનો થવાના છે. જેમાં ફૂડ સ્ટોલની પણ ભરપુર વ્યવસ્થા હોય છે. 

આ વર્ષે સરકાર દ્વારા નવરાત્રિમાં રાત્રે પાંચ વાગ્યા સુધી ગરબા રમવાની છૂટ આપવામાં આવતાં ફૂડ સ્ટોલની માંગ વધુ વધી છે. પરંતુ આ સાથે જ ફૂડ સેફ્ટીને લઈને પણ ચિંતા વધી છે. આ વખતે સરકાર દ્વારા નવરાત્રિમાં રાત્રે પાંચ વાગ્યા સુધી ગરબા રમવાની છૂટ આપવામાં આવતા ફૂડ સ્ટોલની સંખ્યામાં વધારો થવાની સંભાવના છે. કોર્પોરેશનની ફૂડ શાખા દ્વારા આ સમગ્ર મામલે ગંભીરતાથી લેવામાં આવી રહ્યું છે. કોર્પોરેશન દ્વારા નવરાત્રિ દરમિયાન ફૂડ સ્ટોલ પર કડક નજર રાખવામાં આવશે. તમામ ફૂડ સ્ટોલ ધારકો પાસેથી ફૂડ વિભાગનું લાયસન્સ લેવામાટે કાર્યવાહી કરવામાં આવી છે, અને સ્વચ્છતા તથા હાઈજિન માટે કાળજી લેવામાં આવશે. જો કોઈ સ્ટોલધારક નિયમોનું ઉલ્લંઘન કરતો જોવા મળશે તો તેમના વિરુદ્ધ કાર્યવાહી કરવામાં આવશે.

 આ ઉપરાંત, ફૂડ શાખા દ્વારા 3 થી 17 ઓક્ટોબર દરમિયાન ખાદ્ય પદાર્થોની ગુણવત્તાને લઈ વિશેષ પખવાડિયું ઉજવવામાં આવશે. શહેરના તમામ સ્થળોએ વિશેષ ચેકિંગ હાથ ધરવામાં આવશે. કોર્પોરેશનની આ કાર્યવાહીનો હેતુ નવરાત્રિ દરમિયાન લોકોને સ્વચ્છ અને સુરક્ષિત ખાદ્ય પદાર્થો મળી રહે તે સુનિશ્ચિત કરવાનો છે. ખાસ કરીને મોડી રાતે પીરસાતા અને આરોગાતા ખાદ્ય પદાર્થોની ચકાસણીઓ ખૂબ જ મહત્વપૂર્ણ બાબત છે, કેમ કે આવા પદાર્થો ફૂડ પોઈઝનિંગ સહિતની તકલીફો ઉભી કરી શકતા હોય છે. કોર્પોરેશન દ્વારા લેવામાં આવેલી આ કાર્યવાહીથી નગરજનોને નવરાત્રિની ઉજવણીમાં કોઈ અડચણ ન પડે તે માટે પણ તકેદારી રાખવામાં આવશે.