સાયલા થી ઇંગ્લિશ દારૂનો જથ્થો ભરીને હાપા વિસ્તારમાં મકાનમાં ઉતારનાર દારૂના ધંધાર્થીને LCBની ટીમે ઝડપી લીધો

image : Freepik

- 50 નંગ ઇંગ્લિશ દારૂની બાટલીનો જથ્થો કબજે કરાયો: જ્યારે દારૂના સપ્લાયરને ફરાર જાહેર કરાયો

જામનગર,તા.29 જાન્યુઆરી 2024,સોમવાર

જામનગર નજીક હાપા ક્રિષ્ના ટાઉનશીપમાં સાયલા થી ઇંગ્લિશ દારૂનો જથ્થો આયાત કરીને ઉતારવામાં આવ્યો છે, તેવી ચોક્કસ બાતનીના આધારે એલસીબીની ટુકડીએ દરોડો પાડ્યો હતો, અને પચાસ નંગ ઇંગ્લિશ દારૂની બાટલીના જથ્થા સાથે એક શખ્સની અટકાયત કરી છે, જ્યારે દારૂનો જથ્થો સપ્લાય કરનાર જામનગરના અન્ય એક શખ્સને ફરાર જાહેર કરાયો છે.

 જામનગરની લોકલ ક્રાઈમ બ્રાન્ચની ટીમને ચોક્કસ બાતમી મળી હતી, કે જામનગર નજીક હાપામાં ક્રિષ્ના ટાઉનશિપ-2 માં રહેતા વિજય સિંહ ભીખુભા જાડેજા દ્વારા સાયલા થી ઇંગ્લિશ દારૂનો જથ્થો આયાત કરીને પોતાના ઘરમાં ઉતાર્યો છે, અને તેનું ખાનગીમાં વેચાણ કરી રહ્યો છે, જે બાતમીના આધારે ગઈ રાત્રે દરોડો પાડ્યો હતો.

 જે દરોડા દરમિયાન રહેણાંક મકાનમાંથી 50 નંગ ઈંગ્લીશ દારૂની બાટલીનો જથ્થો મળી આવ્યો હતો. આથી પોલીસે દારૂ અને મોબાઈલ ફોન સહિત રૂપિયા 25,000 ની માલમતા કબજે કરી છે, અને દારૂના ધંધાર્થી વિજયસિંહ ભીખુભા  જાડેજાની અટકાયત કરી લીધી હતી.

 પોલીસની પૂછપરછ દરમિયાન તેણે ઉપરોક્ત દારૂનો જથ્થો જામનગરના અજય સિંહ ઉર્ફે મટકુ નામના શખ્સ મારફતે સાયલા થી આયાત કર્યો હોવાનું કબૂલ્યું હતું, જેથી પોલીસે અજયસિંહને ફરાર જાહેર કરી તેની શોધખોળ હાથ ધરી છે.