જામનગર- ખંભાળિયા ધોરી માર્ગ પર સિક્કા પાટીયા પાસે બંધ ટ્રક પાછળ કાર ઘુસી જતાં જામનગરના વેપારી યુવાનનું અંતરીયાળ મૃત્યુ

જામનગર, તા. 13 માર્ચ 2024 બુધવાર

જામનગર- ખંભાળિયા ધોરીમાર્ગ પર ગઈકાલે મોડી સાંજે વધુ એક ગોજારો અકસ્માત સર્જાયો હતો. સિક્કા પાટીયા પાસે માર્ગ પર બંધ પડેલા એક ટ્રકની પાછળ કાર ઘુસી જતાં જામનગરના આશાસ્પદ વેપારી યુવાનનું ગંભીર ઇજા થવાથી અંતરિયાળ મૃત્યુ નીપજયું છે. જે બનાવને લઈને વેપારી ના પરિવારમાં ભારે શોક નું મોજું ફરી વળ્યું છે.

આ અકસ્માતના બનાવની વિગત એવી છે કે જામનગરમાં લીમડાલેન વિસ્તારમાં રહેતા અને બેડીગેઇટ વિસ્તારમાં જયંતીભાઈ માવાવાળા નામથી વેપારી પેઢી ચલાવતા વિજયભાઈ જયંતીભાઈ દુબલ (ઉંમર ૪૭) કે જે વેપારી ગઈકાલે પોતાના વેપારના પૈસાની લેતી-દેતી ના કામ માટે પોતાની કાર લઈને જામનગર થી ખંભાળિયા ગયા હતા, અને ત્યાંથી પોતાનું કામ પતાવીને મોડી સાંજે જામનગર પરત ફરી રહ્યા હતા.

દરમિયાન સિક્કા પાટીયા પાસે માર્ગ પર બંધ પડેલા એક ટ્રકની પાછળ કાર ધડાકાભર અથડાઈ પડતાં ગોઝારો અકસ્માત સર્જાયો હતો. જે અકસ્માતમાં જામનગરના આશાસ્પદ વેપારી યુવાન વિજયભાઈ દુબલ નું ગંભીર ઇજા થવાના કારણે ઘટના સ્થળે જ કમકમાટી ભર્યું મૃત્યુ નીપજયું હતું.આ બનાવની જાણ થતાં મૃતકના પરિવારમાં ભારે શોકનું મોજું ફરી વળ્યું હતું. 

મેઘપર પોલીસને બનાવની જાણ થવાથી મેઘપર પોલીસ સ્ટેશનનો સ્ટાફ ઘટના સ્થળે દોડી ગયો હતો, અને મૃતદેહનો કબજો સંભાળી જામનગરની સરકારી જી.જી. હોસ્પિટલમાં પોસ્ટ મોર્ટમ કરાવ્યું હતું, જયારે આ અકસ્માત ના બનાવ અંગે વધુ તપાસ હાથ ધરી છે.