જામનગરના ધ્રોલમાં દાદી સાથે કપડાં ધોવા ગયેલી યુવતીનું પગ લપસી જતાં ખાડામાં ડૂબી જવાથી મૃત્યુ

image : Freepik

Jamnagar News : જામનગર જિલ્લાના ધ્રોલમાં રહેતી 18 વર્ષની અપરણિત યુવતી પોતાની દાદી સાથે પાણીના ખાડા પાસે કપડાં ધોવા માટે ગઈ હતી, જે દરમિયાન અકસ્માતે પગ લપસી જતાં પાણીના ખાડામાં પડી ગઈ હતી, અને ડૂબી જવાથી કરુણ મૃત્યુ નીપજયું છે.

આ બનાવની વિગત એવી છે કે ધ્રોળમાં ચામુંડા પ્લોટ વિસ્તારમાં રહેતી સાનિયાબેન સલીમભાઈ મકવાણા નામની 18 વર્ષની અપરણિત યુવતી કે જે ગઈકાલે પોતાના દાદી આઈસાબેન સાથે શહીદ વનની પાછળના ભાગમાં આવેલા પાણીના ખાડામાં કપડાં ધોવા માટે ગઈ હતી.

જ્યાં સાનિયાબેનનો અકસ્માતે પગ લપસી જતાં ખાડામાં પડી ગઈ હતી, અને ડૂબી જવાથી તેણીને બેશુદ્ધ  અવસ્થામાં બહાર કાઢી સારવાર માટે ધ્રોળની સરકારી હોસ્પિટલમાં ખસેડવામાં આવી હતી, જ્યાં ફરજ પરના તબીબે તેનુ મૃત્યુ નીપજ્યું હોવાનું જાહેર કર્યું હતું.

આ બનાવ અંગે મૃતકના સંબંધી એલિયાસભાઈ મોહમ્મદભાઈ મકવાણાએ પોલીસને જાણ કરતાં ધ્રોલના પોલીસ હેડ કોન્સ્ટેબલએ મૃતદેહનો કબજો સંભાળી વધુ તપાસ હાથ ધરી છે.