જામનગરમાં ખોડીયાર કોલોની વિસ્તારમાં એક બંધ રહેણાંક મકાનમાં આગ લાગતાં ઘરવખરી ખાખ થઈ

Image Source: Freepik

મકાન માલિક પરિવાર સાથે લગ્ન પ્રસંગમાં કલ્યાણપુર ગયા હતા દરમિયાન પાછળથી મકાનમાં આગ લાગી હતી

જામનગર, તા. 13 માર્ચ 2024 બુધવાર

જામનગરમાં ખોડીયાર કોલોની નજીક આશાપુરા સોસાયટીમાં એક બંધ રહેણાંક મકાનમાં ગઈ કાલે સાંજે આગ લાગ્યાની ઘટના બની હતી. મકાન માલિક પરિવાર સાથે કલ્યાણપુર લગ્ન પ્રસંગમાં ગયા હતા, દરમિયાન પાછળથી આગ લાગી હોવાનું જાણવા મળ્યું છે.

આગના આ બનાવની વિગત એવી છે કે જામનગરમાં ખોડીયાર કોલોની નજીક આશાપુરા સોસાયટીમાં ગરબીચોકમાં રહેતા અને નિવૃત્ત જીવન જીવતા હસમુખભાઈ માયાભાઈ જામ નામના ૫૮ વર્ષના પ્રૌઢ, કે જેઓ પોતાના મકાનને તાળું મારીને ગઈકાલે સવારે દેવભૂમિ દ્વારકા જિલ્લાના કલ્યાણપુર તાલુકાના માળી ગામમાં પોતાના ભત્રીજા ના લગ્ન પ્રસંગમાં હાજરી આપવા માટે ગયા હતા.

દરમિયાન પાછળથી તેમના મકાનમાં કોઈ કારણસર આગ લાગી ગઈ હતી. ગઈકાલે રાત્રિના ૯.૦૦ વાગ્યાના અરસામાં તેઓ પરિવાર સહિત પાછા ફર્યા ત્યારે તેઓના મકાનમાં આગ લાગી ગઈ હોવાનું અને કેટલીક ઘરવખરી, ઈલેક્ટ્રીક વાયર, વીજ મીટર વગેરે બળી ગયા હોવાનું ધ્યાનમાં આવ્યું હતું.

જેથી જામનગરના સીટી સી. ડિવિઝન પોલીસ મથકમાં જાણવા જોગ એન્ટ્રી કરાવતાં પોલીસ હેડ કોન્સ્ટેબલ એ.એન. નિમાવત બનાવના સ્થળે પહોંચી ગયા હતા, અને આગના બનાવ અંગે તપાસ શરૂ કરી પંચનામાની કાર્યવાહી હાથ ધરી છે.