યહૂદીઓનો ખાતમો કરવામાં હમાસની મદદ કરીશું, આર્મેનિયામાં ઈઝરાયેલ સામે નફરત ચરમસીમાએ

                                                            Image Source: Twitter

તેલ અવીવ, તા. 17. નવેમ્બર 2023 શુક્રવાર

હમાસ અને ઈઝરાયેલના જંગ વચ્ચે મોટા ભાગના મુસ્લિમ દેશો ઈઝરાયેલની આકરી ટીકા કરી ચુકયા છે ત્યારે બિન મુસ્લિમ દેશ આર્મેનિયામાં ઈઝરાયેલ વિરોધી લહેર ચરમસીમાએ છે.

આર્મેનિયાના લોકો અને રાજકીય નિષ્ણાતો ઈઝરાયેલની ખુલ્લેઆમ ઝાટકણી કાઢી રહ્યા છે.આર્મેનિયાની સેનાના પૂર્વ અધિકારી અને સંરક્ષણ નિષ્ણાતે તો ત્યાં સુધી કહ્યુ છે કે, અમે યહૂદીઓની હત્યા કરવામાં હમાસની મદદ કરી શું.

આર્મેનિયામાં ઈઝરાયેલ સામે નફરતનુ કારણ એ છે કે, આર્મેનિયાના કટ્ટર દુશ્મન અઝર બૈજાનની ઈઝરાયેલ ખુલ્લેઆમ મદદ કરી રહ્યુ છે અને હથિયારો પૂરા પાડી રહ્યુ છે તો બીજી તરફ ઈરાન આર્મેનિયાની પડખે ઉભુ છે.

આર્મેનિયાની સેનાના પૂર્વ અધિકારી અને સંરક્ષણ નિષ્ણાત વ્લાદિમીર પોઘિસ્યાને દાવો કર્યો છે કે, યહૂદીઓને મારવામાં હું હમાસની મદદ કરીશ.

આર્મેનિયાના રાષ્ટ્રપતિના પૂર્વ મુખ્ય સલાહકાર રહી ચુકેલા વ્લાદિમીર પોઘિસ્યાને એક વિડિયો બનાવ્યો છે અને તેમાં તે કહેતો સંભળાય છે કે, યહૂદી ઘેટાઓને સમાપ્ત કરી દેવા જોઈએ.તેઓ વિનાશકારી લોકો છે અને તેમને ધરતી પર રહેવાનો અધિકાર નથી.ઈઝરાયેલ એક ફાસિસ્ટ દેશ છે.યહૂદીઓ આર્મેનિયાના લોકોને મારવા માટે અઝરબૈજાનની મદદ કરી રહ્યા છે.

ઉલ્લેખનીય છે કે, નાગર્નો કરાખાબ વિસ્તાર માટે આર્મેનિયા અને અઝરબૈજાન વચ્ચે થયેલા યુધ્ધમાં ઈઝરાયેલના હથિયારોની મદદથી અઝરબૈજાને આર્મેનિયાને હરાવીને આ વિસ્તાર પર તાજેતરમાં કબ્જો જમાવી દીધો હતો.આ વિસ્તારમાંથી આર્મેનિયાના હજારો નાગરિકોને ભાગવાનો વારો આવ્યો છે.

બીજી તરફ ભારત આ યુધ્ધમાં આર્મેનિયાની મદદ કરી રહ્યુ છે અને તેને પિનાકા મલ્ટી બેરલ રોકેટ લોન્ચર સિસ્ટમ જેવા હથિયારો પણ પૂરા પાડી રહ્યુ છે.