એન્ટાર્કટિકામાંથી વિખુટી પડેલી મહાકાય હિમશીલા 920 ફૂટ જાડી અને 1,500 ચો.કિ.મી.માં ફેલાયેલી છે

- યુરોપિયન સ્પેસ એજન્સીના સેટેલાઇટની ઇમેજ દ્વારા સચોટ માહિતી મળી

- વિશ્વની સૌથી  વિરાટકાય હિમશીલા જે કોઇ ખંડ સાથે પ્રચંડ તાકાત સાથે ટકરાશે ત્યાં ભારે મોટું નુકસાન થવાનો સંકેત

લંડન/મુંબઇ:  પૃથ્વીના સૌથી ઠંડાગાર ખંડ એન્ટાર્કટિકાના સમુદ્ર કિનારા પરથી છૂટી પડી ગયેલી વિશ્વની સૌથી મહાકાય હિમશીલા (આઇસબર્ગ)-- એ ૨૩ એ -- ના આકારની અને  તેની  જાડાઇની સચોટ વિગતો મળી ગઇ છે.   યુરોપિયન સ્પેસ એજન્સી  (ઇએસએ)  ના ક્રાયોસેટ -૨ સેટલાઇટની ઇમેજ દ્વારા   જાણવા મળ્યું  છે કે -- એ૨૩એ  -- હિમશીલા ૨૮૦ મીટર(૯૨૦ ફૂટ) કરતાં પણ વધુ  જાડી છે. જ્યારે આ હિમશીલા૩,૯૦૦ ચોરસ કિલોમીટર(૧,૫૦૦ ચોરસ માઇલ)ના વિશાળ  વિસ્તારમાં ફેલાયેલી  છે.

ચિંતાજનક બાબત તો એ છે કે આ મહાકાય હિમશીલા છેલ્લાં ૩૦ વર્ષથી એન્ટાર્કટિકાના દક્ષિણ વેડેલ  સમુદ્રમાં અટકી ગઇ હતી.  હવે જોકે આ વિરાટ હિમશીલા ત્યાંથી આગળ વધી રહી છે. 

યુનિવર્સિટી ઓફ ટ્રોમ્સો -- આર્કટિક યુનિવર્સિટી ઓફ નોર્વેના વિજ્ઞાાની ડો.એન્ને બ્રેકમેન્ન--ફોલ્ગમેન્ને એવી માહિતી આપી છે કે  અમને ઇએસએના સેટેલાઇટક્રાયોસેટ - ૨ની ઇેમજ દ્વારા એન્ટાર્કટિકાની આ મહાકાય હિમશીલાની લંબાઇ,પહોળાઇ,જાડાઇ  સહિત તે સમુદ્રના ચોક્કસ કેટલા વિસ્તારમાં પથરાયેલી છે અને તેમાંના બરફની ઘનતા વગેરેની સચોટ માહિતી મળી છે.સેટેલાઇટની ઇમેજીસના  અભ્યાસ દ્વારા કહી શકાય કે આ હિમશીલામાં લગભગ એક(૧) લાખ કરોડ ટન જેટલો બરફ હશે.  

યુનિવર્સિટી  કોલેજ  ઓફ લંડન એન્ડ નેચરલ એનવાર્યર્નમેન્ટ રિસર્ચ કોઉન્સિલ સેન્ટર ફોર પોલાર ઓબ્ઝર્વેશન એન્ડ મોડેલિંગના વિજ્ઞાાની ડો. એન્ડી રિડોટ અને તેની ટીમે એવી માહિતી આપી છે  કે એન્ટાર્કટિકાની --એ ૨૩ એ -- હિમશીલા અત્યારસુધીની સૌથી વિરાટકાય હિમશીલા છે. આ હિમશીલા ૧૯૮૬માં એન્ટાર્કટિકાના સમુદ્ર કિનારાથી તૂટીને વિખુટી પડી ગઇ છે.  હવે જોકે આ હિમશીલા નજીકના ભવિષ્યમાં ગરમ સમુદ્રના પાણીમાં  ચોક્કસ કેટલી પાતળી થાય છે  અથવા  તે હજી પણ વધુ તૂટે  છે કે  કેમ તેની વિગતો પણ જાણવા મળશે. 

ઇએસએના ક્રાયોસેટ -૨ ની ઇમેજ દ્વારા એવી માહિતી પણ મળી છે કે --એ ૨૩ એ -- હિમશીલા એક સરખી નથી પણ તેના અમુક હિસ્સા બહુ મોટા છે. જ્યારે કેટલાક ભાગમાં મોટી તિરાડ પણ પડી ગઇ છે. વળી, આ હિમશીલાનો એક હિસ્સો સમુદ્રમાં ૩૫૦ મીટર (૧,૦૫૦ ફૂટ) જેટલો ડૂબેલો પણ છે. 

ઇન્ડિયન ઇન્સ્ટિટયુટ ઓફ જીઓમેગ્નેટિઝમ(આઇ.આઇ.જી. --નવી મુંબઇ)ના સિનિયર વિજ્ઞાાની (નિવૃત્ત) અને ભારતના  એન્ટાર્કટિકાના કાયમી સંશોધન મથક ભારતીમાં ૧૨ વખત જઇ આવેલા અજય ધરે એવી માહિતી આપી હતી  કે વિશ્વની સૌથી મહાકાય હિમશીલા -- એ૨૩એ -- ના હવે સમય જતાં નાના નાના પણ વિશાળ ટુકડા થઇ રહ્યા  છે. ગંભીર બાબત તો એ છે  કે હવે આ વિરાટ હિમશીલા ચોક્કસ કઇ દિશામાં જશે તે કહી ન શકાય.કારણ એ છે કે સમુદ્રમાંનો કરન્ટ, સાયક્લોનની અસર, પવનની દિશા વગેરે કુદરતી પરિબળો બહુ મહત્વનાં ગણાય. ઉપરાંત, એક નાના દેશના ક્ષેત્રફળ જેટલી વિશાળ હિમશીલા  કદાચ પણ કોઇ ખંડ સાથે અથવા જમીન સાથે પ્રચંડ તાકાત સાથે  ટકરાશે તો કેટલું નુકસાન થશે તેની કલ્પના ન થઇ શકે. 

આટલું જ નહીં, આટલી મહાકાય હિમશીલા સંપૂર્ણપણે ઓગળી જશે ત્યારે તેનો બરફનો વિપુલ જથ્થો પાણી બનીને  મહાસાગરોમાં  જ ઠલવાશે.પરિણામે વિશ્વના મહાસાગરોની સપાટી પણ વધશે અને સરવાળે તેના કિનારાના બધા દેશ ડૂબી જવાનું પૂરું જોખમ રહેશે.

એન્ટાર્કટિકામાં જે કાંઇ ચિંતાજનક ગતિવિધિ થઇ રહી છે તેનું સૌથી મોટું અને મહત્વનું કારણ છે ગ્લોબલ વોર્મિંગ. ગ્લોબલ વોર્મિંગ વિશે ભલે મોટી મોટી કોન્ફરન્સ યોજાય પણ અમેરિકા અને યુરોપના દેશ  સહિત વિશ્વના કોઇ દેશ તેના માટે કોઇ જ ગંભીર કાર્યવાહી નથી કરતા.