મિડીયા ટાઈકૂન રૂપર્ટ મર્ડોક 92 વર્ષે પાંચમી વખત લગ્ન કરશે

- મર્ડોકે 2022માં ચોથી પત્નીને છૂટાછેડા આપ્યા હતા 

- 67 વર્ષીય નિવૃત્ત વિજ્ઞાની એલેના ઝુકોવા સાથે મર્કોડની સગાઈ થઈ, જૂનમાં લગ્ન : બંને ચારેક મહિનાથી રિલેશનશિપમાં

વૉશિંગ્ટન : વિશ્વ વિખ્યાત મિડીયા ટાઈકૂન રૂપર્ટ મર્ડોક ૯૨ વર્ષની વયે પાંચમી વખત લગ્ન કરવાના છે. નિવૃત્ત વિજ્ઞાની એલેના ઝુકોવા સાથે મર્કોડે સગાઈ કરી છે. એલેનાની વય ૬૭ વર્ષ છે. એલેના અને મર્કોડ એકબીજાને વર્ષોથી ઓળખે છે. મર્કોડની ત્રીજી પત્ની વેન્ડી ડેંગના એક કાર્યક્રમમાં વર્ષો પહેલાં બંનેની મુલાકાત થઈ હતી. એલેનાને ૪૨ વર્ષની એક દીકરી છે. જ્યારે મર્કોડને કુલ છ સંતાનો છે.

અખબારી અહેવાલોમાં દાવો થયો હતો કે ૯૨ વર્ષના રૂપર્ટ મર્કોડે એલેના સાથે સગાઈ કરી લીધી છે અને બંને જુન મહિનામાં લગ્ન કરશે. લગ્ન માટે નજીકના મિત્રોને તેમ જ સગાં-સંબંધીઓને નોતરા આપી દેવાયા છે. ૯૨ વર્ષના રૂપર્ટ મર્કોડ પાંચમી વખત લગ્ન કરશે તે સમાચારોએ સૌનું ધ્યાન ખેંચ્યું છે. અગાઉ મર્કોડે ૨૦૨૨માં ચોથી પત્ની જેરી હોલને છૂટાછેડા આપ્યા હતા. જેરી સાથે મર્કોડે ૨૦૧૬માં લગ્ન કર્યા હતા. તે પછી ૨૦૨૩ના માર્ચ મહિનામાં મર્કોડે અમેરિકન રેડિયો હોસ્ટ એન સ્મિથ સાથે સગાઈ કર્યાના અહેવાલો આવ્યા હતા, પરંતુ ૧૫ દિવસમાં સગાઈ તૂટી ગઈ હતી. છેલ્લાં ચારેક મહિનાથી એલેના અને મર્કોડ સાથે જોવા મળતા હતા.

મર્કોડે ગયા વર્ષના અંતે જ પોતાના મિડીયા સામ્રાજ્યમાંથી સંપૂર્ણ રીતે નિવૃત્તિ લઈ લેવાની જાહેરાત કરી હતી. ૯૨ વર્ષના મર્કોડની સંપત્તિ નવ અબજ ડોલરની છે. મર્કોડની કંપની ન્યૂઝ કોર્પોરેશન પાસે વોલ સ્ટ્રીટ જર્નલથી ફોક્સ ન્યૂઝ, સ્કાઈ ન્યૂઝ ઓસ્ટ્રેલિયા જેવા કેટલાય મોટા અખબારોની માલિકી છે. તો વળી, હાર્પર કોલિન્સ જેવા કેટલીય પ્રકાશન કંપનીઓની પણ માલિકી તેમની પાસે છે. 

રેડિયો હોસ્ટ સાથે થયેલી સગાઈ ચાર મહિના પહેલાં તૂટી હતી

રૂપર્ટ મર્ડોક છેલ્લે અમેરિકન રેડિયો હોસ્ટ એન લેસ્લી સ્મિત સાથે રિલેશનશિપમાં હતા. 

બંનેએ માર્ચ-૨૦૨૩માં સગાઈ કરી હતી. બંનેના લગ્ન ૨૦૨૩ના અંતે થવાની ચર્ચા હતી, પરંતુ ૧૫ દિવસમાં જ સગાઈ તૂટી ગઈ હતી. 

એ પછી મર્કોડ એલેના સાથે જોવા મળતા હતા. મર્કોડ અગાઉ ચાર વખત લગ્ન કરી ચૂક્યા છે. ઓસ્ટ્રેલિયન એર હોસ્ટેસ પેટ્રિસિયા બુકર સાથે ૧૯૫૬માં પ્રથમ લગ્ન કર્યા હતા. એ બંનેના ૧૯૬૭માં છૂટાછેડા થયા હતા. તે પછી ઓસ્ટ્રેલિયન પત્રકાર અને નવલકથાકાર એન્ના મારિયા ટોવ સાથે ૧૯૬૭માં લગ્ન કર્યા હતા. ૧૯૯૯માં બંનેએ ડિવોર્સ લીધા હતા. ૧૯૯૯માં જ ઉદ્યોગ સાહસિક અને ફિલ્મ પ્રોડયુસર વેન્ડી ડોંગ સાથે ત્રીજા લગ્ન કર્યા હતા.

 ૨૦૧૩માં બંનેના ડિવોર્સ થયા હતા. ૨૦૧૬માં અમેરિકન અભિનેત્રી અને મોડલ જેરી હોલ સાથે થયેલા લગ્નનો અંત ૨૦૨૨માં આવ્યો હતો.