જસ્ટિન ટ્રુડો ન આપી શક્યા ખાલિસ્તાનીઓથી સુરક્ષાનો ભરોસો, કેનેડામાં અનેક કેમ્પ રદ કરી શકે છે ભારત

India cancels consular camps in Toronto: ભારત અને કેનેડા વચ્ચેના સંબંધો દિવસેને દિવસે બગડી રહ્યા છે. આ ક્રમમાં, ટોરોન્ટોમાં ભારતીય કોન્સ્યુલેટ જનરલે તેના કેટલાક સુનિશ્ચિત કોન્સ્યુલર કેમ્પ્સ રદ કર્યા છે. તેની પાછળનું કારણ કેનેડા દ્વારા પૂરતી સુરક્ષા ન આપવાનું કહેવામાં આવ્યું છે. ભારતીય દૂતાવાસે આ અંગે જણાવ્યું હતું કે, સુરક્ષા એજન્સીઓએ સમુદાય શિબિરના આયોજકોને ન્યૂનતમ સુરક્ષા આપવામાં અસમર્થતા દર્શાવી છે. જેના કારણે અમારે અમારા કાર્યક્રમો રદ્દ કરવા પડ્યા છે. 

બ્રામ્પટનમાં હિન્દુ સભા મંદિર પર હુમલો થયા બાદ નિર્ણય લેવાયો 

ભારતીય વાણિજ્ય દૂતાવાસ દ્વારા સંયુક્ત રીતે આયોજિત કોન્સ્યુલર કાર્યક્રમમાં ખાલિસ્તાની ધ્વજ સાથેના વિરોધીઓએ બ્રામ્પટનમાં હિન્દુ સભા મંદિર પર હુમલો કર્યો હોવાથી આ નિર્ણય લેવામાં આવ્યો છે. 3 નવેમ્બરના રોજ, બ્રામ્પટનમાં હિન્દુ સભા મંદિરમાં વિરોધ થયો હતો અને સોશિયલ મીડિયામાં તેનો વીડિયો વાયરલ થયો હતો. જેમાં વિરોધીઓ ખાલિસ્તાનના સમર્થનમાં બેનરો પકડીને જોઈ શકાય છે. વિરોધીઓએ લોકો પર હુમલો કર્યો અને કોન્સ્યુલેટની કામગીરીમાં વિક્ષેપ પાડ્યો.

વડાપ્રધાન મોદીએ કરી નિંદા

સોશિયલ મીડિયા પ્લેટફોર્મ પર એક નિવેદનમાં વડા પ્રધાન મોદીએ હિંદુ મંદિર પરિસરમાં હિંદુઓ વિરુદ્ધ ખાલિસ્તાન તરફી કટ્ટરપંથીઓની હિંસાની નિંદા કરી હતી. X પર એક પોસ્ટમાં, તેણે તેને હિંદુ મંદિર પર 'ઇરાદાપૂર્વકનો હુમલો' ગણાવ્યો.

કેનેડિયન સત્તાવાળા સુરક્ષા આપશે તો જ આવા કેમ્પનું આયોજન થશે 

ઓટાવામાં ભારતના હાઈ કમિશને જણાવ્યું હતું કે અનેક અવરોધો છતાં 1000 થી વધુ જીવન પ્રમાણપત્રો જારી કરવામાં આવ્યા છે. જો કે, હાઈ કમિશને કહ્યું કે ભવિષ્યમાં આવા કેમ્પનું આયોજન કેનેડિયન સત્તાવાળાઓ દ્વારા કરવામાં આવેલી સુરક્ષા વ્યવસ્થા પર નિર્ભર રહેશે. જ્યારે પરિસ્થિતિ અશક્ય હશે ત્યારે વૈકલ્પિક વ્યવસ્થા કરવામાં આવશે. હાઈ કમિશને કહ્યું કે દુર્ભાગ્યવશ કેનેડિયન સુરક્ષા એજન્સીઓના અસહકારને કારણે સ્થાનિક વપરાશકર્તાઓને આ સુવિધાઓથી વંચિત રાખવામાં આવી રહ્યા છે.

10 કોન્સ્યુલર કેમ્પનું આયોજન નવેમ્બરમાં થયું હતું 

નવેમ્બરમાં આવા 10 કોન્સ્યુલર કેમ્પનું આયોજન કરવામાં આવ્યું હતું. હાલમાં કેટલા શિબિરો રદ કરવામાં આવી છે તે જાણી શકાયું નથી. આ શિબિરો ટોરોન્ટો એરિયામાં બ્રેમ્પટન અને મિસીસૌગામાં મંદિરો અને ગુરુદ્વારા, ઓન્ટેરિયોમાં વિન્ડસર, ઓકવિલે, લંડન અને કિચનર અને નોવા સ્કોટીયામાં હેલિફેક્સ શહેરો સહિત અનેક સ્થળોએ સુનિશ્ચિત કરવામાં આવી હતી.

PRESS RELEASE

"Violent disruption outside consular camp in Brampton, Ontario (Nov 3)"@MEAIndia @IndianDiplomacy @diaspora_india @cgivancouver @IndiainToronto pic.twitter.com/V7QNMmA4eR

— India in Canada (@HCI_Ottawa) November 4, 2024

રવિવારના હુમલા બાદ હિંદુ સમુદાયમાં રોષ

રવિવારના હુમલા બાદ તણાવ વધુ વધ્યો છે કારણ કે તેનાથી હિંદુ સમુદાયમાં રોષ ફેલાયો છે. હુમલાના વિરોધમાં સોમવારે લગભગ 5,000 ઈન્ડો-કેનેડિયનોએ રેલી કાઢી હતી પરંતુ કેનેડિયન પોલીસે આખરે તેને ગેરકાયદેસર જાહેર કરીને વિખેરી નાખ્યું હતું. બીજી તરફ, પીલ પ્રાદેશિક પોલીસે એક ઑફ-ડ્યુટી અધિકારીને સસ્પેન્ડ કર્યા છે જ્યારે ખાલિસ્તાન તરફી વિરોધમાં ભાગ લેવા બદલ ચાર લોકોની ધરપકડ કરી છે.