'નવાઝ શરીફનો લંડન પ્લાન નિષ્ફળ રહ્યો..' જેલમાં કેદ ઈમરાન ખાનનો બે તૃતીયાંશ બહુમતીનો દાવો

Pakistan Election Results News 2024 | પાકિસ્તાનની સામાન્ય ચૂંટણીમાં કોઈપણ પક્ષને હજુ સુધી બહુમતી મળી નથી. મતગણતરી ચાલુ છે. આ દરમિયાન જેલમાં કેદ પાકિસ્તાનના પૂર્વ વડાપ્રધાન અને પીટીઆઈ પ્રમુખ ઈમરાન ખાને મોટો દાવો કર્યો છે. 

શું દાવો કર્યો ઈમરાન ખાને? 

તેમણે કહ્યું કે પીટીઆઈ સમર્થિત ઉમેદવારોએ બે તૃતીયાંશ બહુમતી મેળવી લીધી છે. ખાને દાવો કર્યો હતો કે PTI સમર્થિત ઉમેદવારો ફોર્મ 45 ડેટા મુજબ 170 થી વધુ બેઠકો જીતી રહ્યા છે. આ દરમિયાન તેમણે પાકિસ્તાન મુસ્લિમ લીગ-નવાઝ (PML-N)ના વડા અને પૂર્વ વડાપ્રધાન નવાઝ શરીફ સામે પણ નિશાન સાધ્યું હતું. તેમણે 30 બેઠકો પર પાછળ હોવા છતાં વિજયી ભાષણ આપ્યું હતું. કોઈ પાકિસ્તાની આ વાતને સ્વીકારશે નહીં. આંતરરાષ્ટ્રીય મીડિયા પણ તેમની નવાઝની મૂર્ખતા વિશે લખી રહ્યું છે. ખાને પાકિસ્તાનના લોકોનો ખૂબ આભાર માન્યો.

લંડન પ્લાન નિષ્ફળ ગયાનો ઈમરાન ખાનનો દાવો 

ઇમરાને AI-જનરેટેડ ભાષણમાં કહ્યું કે હું તમને બધાને ચૂંટણી 2024 જીતવા બદલ અભિનંદન આપું છું. મને તમારા બધામાં પૂરો વિશ્વાસ હતો કે તમે બધા ચોક્કસપણે મતદાન કરવા માટે બહાર આવશો અને તમે મારા વિશ્વાસનું સન્માન કર્યું છે અને તમારા જંગી મતદાનથી બધાને આશ્ચર્ય થયું છે. તમારા મતને કારણે લંડનની યોજના નિષ્ફળ ગઈ છે. ઈમરાને વધુમાં કહ્યું, 'નવાઝ શરીફ એક નબળા વ્યક્તિ છે, જેમણે સત્તાવાર આંકડાઓ અનુસાર 30 સીટો પાછળ હોવા છતાં જીતનું ભાષણ આપ્યું. કોઈ પાકિસ્તાની આ વાત સ્વીકારશે નહીં.