સેમિકન્ડક્ટર ઉદ્યોગના પિતા ગણાતા ગોર્ડન મૂરેનું 94 વર્ષની વયે નિધન
તેમણે મિત્ર રોબર્ટ નોયસ સાથે ઇન્ટેલની સહ-સ્થાપના કરી હતી
તેમણે પ્રેસિડેન્શિયલ મેડલ ઓફ ફ્રીડમ મળ્યુ હતું
Updated: Mar 25th, 2023
| Image : Wikipedia |
અમદાવાદ, 25 માર્ચ 2023, શનિવાર
સિલિકોન વેલીના અગ્રણી અને ઇન્ટેલના સહ-સ્થાપક ગોર્ડન મૂરેનું 94 વર્ષની વયે નિધન થયું છે. સેમિકન્ડક્ટર ચિપ્સની ડિઝાઈન અને ઉત્પાદનમાં તેમણે મહત્વની ભૂમિકા ભજવી હતી. ગોર્ડન મૂરેનો જન્મ 3 જાન્યુઆરી 1929ના રોજ સાન ફ્રાન્સિસ્કોમાં થયો હતો.
ગાર્ડન મૂરેએ બર્કલે ખાતે યુનિવર્સિટી ઓફ કેલિફોર્નિયામાંથી તેમની ડિગ્રી મેળવી. તેમણે મેરીલેન્ડમાં જોન્સ હોપકિન્સ એપ્લાઇડ ફિઝિક્સ લેબોરેટરીમાં તેમણે સંશોધન કારકિર્દીની શરૂઆત કરી હતી. શોકલી સેમિકન્ડક્ટરમાં જોડાવા માટે તેઓ 1956માં કેલિફોર્નિયા પાછા ફર્યા હતા. તેમણે તેમના લાંબા સમયના મિત્ર રોબર્ટ નોયસ સાથે 1968માં ઇન્ટેલની સહ-સ્થાપના કરી હતી. તેમણે રાષ્ટ્રપતિ જ્યોર્જ એચ.ડબલ્યુ. બુશ પાસેથી નેશનલ મેડલ ઓફ ટેક્નોલોજી મેળવ્યો હતો. તેમને રાષ્ટ્રનું સર્વોચ્ચ નાગરિક સન્માન પ્રેસિડેન્શિયલ મેડલ ઓફ ફ્રીડમ મળ્યુ હતું. આ ઉપરાંત 1950માં મૂરેએ બેટ્ટી આઈ વિટ્ટેકર સાથે લગ્ન કર્યા હતા. મૂરેના પરિવારમાં પુત્રો કેનેથ અને સ્ટીવન અને ચાર પૌત્રો છે.
ગોર્ડન મૂરેના નિધન પર ઇન્ટેલે તેના ટ્વિટર હેન્ડલ પર લખ્યું હતું કે આજે આપણે એક સ્વપ્નદ્રષ્ટા ગુમાવ્યા છે. ગોર્ડન મૂરે થેક્યુ ફોર એવરીથીંગ. કંપનીના વર્તમાન CEO પેટ ગેલ્સિંગરે જણાવ્યું હતું કે તેમણે માત્ર તેમની વિચારસરણી અને દૂરદ્રષ્ટિથી ટેક્નોલોજી ઉદ્યોગને વ્યાખ્યાયિત કરવાની સાથે સાથે દાયકાઓ સુધી વૈજ્ઞાનિકો અને ઉદ્યોગસાહસિકોને પણ પ્રેરણા આપી છે.
