ભારતની મોટી કૂટનીતિક જીત, ગલવાન ખીણમાંથી ચાઈનીઝ સૈનિકો પાછા ફર્યા, બેઈજિંગે શું કહ્યું?

India and China: પૂર્વી લદ્દાખમાં ભારત અને ચીન (India and China)વચ્ચે ચાર વર્ષથી ચાલી રહેલ સૈન્ય ગતિરોધ ધીરે ધીરે ખતમ થતો જણાય છે. મળતી માહિતી પ્રમાણે,ચીને પૂર્વી લદ્દાખના ગલવાન સહિત ચાર પોઈન્ટ પરથી પોતાના સૈનિકોને હટાવી લીધા છે. ચીનના વિદેશ મંત્રાલયે ખુદ આ વાતની પુષ્ટિ કરી છે. તેમાં કહેવામાં આવ્યું છે કે ભારત અને ચીન, રશિયામાં તેમની બેઠક દરમિયાન, દ્વિપક્ષીય સંબંધો સુધારવા માટે વાતાવરણ બનાવવા માટે સાથે મળીને કામ કરવા માટે સંમત થયા છે.

રાષ્ટ્રીય સુરક્ષા સલાહકાર અજિત ડોભાલ અને ચીનના વિદેશ મંત્રી વાંગ યીએ ગુરુવારે રશિયાના સેન્ટ પીટર્સબર્ગમાં બ્રિક્સના સભ્ય દેશોમાં સુરક્ષા બાબતો માટે જવાબદાર ઉચ્ચ સ્તરીય અધિકારીઓની બેઠક દરમિયાન વાટાઘાટો કરી હતી, ચીનની એક પ્રેસ રિલીઝ મુજબ, વિદેશ મંત્રાલય આ દરમિયાન બંને પક્ષોએ સરહદી મુદ્દાઓ પર તાજેતરના વિચાર વિમર્શ પર થયેલી પ્રગતિ અંગે ચર્ચા કરી હતી.

ચીનના વિદેશ મંત્રાલયના પ્રવક્તા માઓ નિંગને શુક્રવારે એક પ્રેસ કોન્ફરન્સ દરમિયાન પૂછવામાં આવ્યું કે શું બંને દેશો પૂર્વી લદ્દાખમાં સૈન્ય અવરોધને કારણે 4 વર્ષથી વધુ સમયથી દ્વિપક્ષીય સંબંધો પર જામી ગયેલી બરફને દૂર કરવાની નજીક પહોંચી ગયા છે. 

આ સવાલના જવાબમાં માઓએ કહ્યું કે, બંને સેનાઓ ચાર વિસ્તારોમાંથી હટી ગઈ છે અને સરહદ પર સ્થિતિ સ્થિર છે. 

ચાર ક્ષેત્રોમાંથી પાછી હટી ગઇ છે સેના: ચીન 

માઓએ કહ્યું કે, હાલના વર્ષોમાં બંને દેશોની ફ્રન્ટલાઈન સેનાઓએ ગલવાન ખીણ સહિત ચીન-ભારત સરહદના પશ્ચિમી સેક્ટરના ચાર ક્ષેત્રોથી પાછળ હટવાનું કામ પૂર્ણ કર્યું છે. ચીન-ભારત સરહદ પર સ્થિતિ સામાન્ય રીતે સ્થિર અને નિયંત્રણમાં છે.

ચીનના વિદેશ મંત્રાલયની આ ટિપ્પણી વિદેશ મંત્રી એસ જયશંકર દ્વારા જીનીવામાં આપેલા નિવેદનના એક દિવસ બાદ આવી છે. 

જયશંકરે કહ્યું હતું કે, ચીન સાથે સૈનિકો પાછા ખેંચવા સંબંધિત લગભગ 75 ટકા સમસ્યાઓનું સમાધાન થઈ ગયું છે, પરંતુ સૌથી મોટો મુદ્દો સરહદ પર વધી રહેલા સૈન્યીકરણનો છે. 

ડોભાલ અને વાંગ વચ્ચેની બેઠક વિશે વિગતવાર માહિતી આપતાં ચીનના વિદેશ મંત્રાલયે રિલીઝમાં કહ્યું કે, બંને પક્ષોએ એ વિશ્વાસ વ્યક્ત કર્યો છેકે, ચીન-ભારત સંબંધોની સ્થિરતા બંને દેશોના લોકોના મૂળભૂત અને લાંબા ગાળાના હિતમાં છે અને પ્રાદેશિક શાંતિ અને વિકાસ માટે અનુકૂળ છે. 

દ્વિસંબંધોને વધારવા માટે સહમતિ  

વધુમાં તેમાં કહેવામાં આવ્યું છે કે, ચીન અને ભારત બંને દેશોના સરકારના પ્રમુખો વચ્ચે થયેલી સર્વસંમતિને અમલમાં મૂકવા, પરસ્પર સમજણ અને વિશ્વાસ વધારવા, સતત સંદેશાવ્યવહાર જાળવવા અને દ્વિપક્ષીય સંબંધોને પ્રોત્સાહન આપવા માટે સંમત થયા છે.

સરકારી સમાચાર એજન્સી શિન્હુઆના રિપોર્ટ પ્રમાણે, વાંગ, જેઓ ચીનની કમ્યુનિસ્ટ પાર્ટીની સેન્ટ્રલ કમિટીના પોલિટિકલ બ્યુરોના સભ્ય પણ છે, તેમણે આ વાત પર ભારપૂર્વક જણાવ્યું હતું કે, અશાંત વિશ્વનો સામનો કરી રહેલા ચીન અને ભારતને બે પ્રાચીન પૂર્વીય સભ્યતાઓ અને ઉભરતા વિકાસશીલ દેશોના રુપમાં સ્વતંત્રતા પર અટલ રહેવુ જોઇએ,એકતા અને સહયોગની પસંદગી કરવી જોઇએ તેમજ એકબીજાનું શોષણ કરતા બચવુ જોઇએ.  

ભારત અને ચીનની સેનાઓ વચ્ચે મે 2020થી અથડામણ ચાલી રહી છે અને સરહદ વિવાદ હજુ સુધી સંપૂર્ણ રીતે ઉકેલાયો નથી. જો કે, બંને પક્ષોએ ઘણા સંઘર્ષના સ્થળોએથી તેમના સૈનિકોને પાછા ખેંચી લીધા છે. જૂન 2020માં ગલવાન ઘાટીમાં ભીષણ અથડામણ બાદ બંને દેશો વચ્ચેના સંબંધો બગડ્યા હતા. 

ભારતનું સ્પષ્ટ વલણ છે કે જ્યાં સુધી સરહદી વિસ્તારોમાં શાંતિ નહીં હોય ત્યાં સુધી ચીન સાથે તેના સંબંધો સામાન્ય નહીં થઈ શકે.

આ પણ વાંચો: ઉત્તર કોરિયાએ યુરેનિયમ એનરિચમેન્ટ ફેસિલિટીની તસવીરો જાહેર કરી, પરમાણુ શસ્ત્રો બનાવવા સૌથી મહત્ત્વનું મટિરિયલ