VIDEO : ચીનનું ગંભીર કારસ્તાન, ફિલિપાઈન્સના જહાજને મારી ટક્કર, સૈનિકો વચ્ચે મારામારી

ચીનના કોઈ એક દેશ સાથે નહીં પણ અનેક દેશો સાથે સરહદ અને સમુદ્ર મામલે વિવાદો થતા રહે છે, ત્યારે ચીનની વધુ એક ગંભીર કરતુત સામે આવી છે. આજે રવિવારે ચીનનું જહાજ ફિલિપાઈન્સના જહાજ સાથે ટકરાયું છે, એટલું જ નહીં ત્યારબાદ બંને દેશોના ગુસ્સે થયેલા સૈનિકો વચ્ચે છુટા હાથની મારામારી પણ થઈ છે. ચીને જાણીજોઈને ટક્કર મારી હોવાનું તેમજ ફિલિપાઈન્સના જહાજને આગળ જતું અટકાવ્યું હોવાનો આક્ષેપ થયો છે.

ચીની જહાજે ફિલિપાઈન્સના 3 જહાજો પર પાણીનો મારો કર્યો

ફિલિપાઈન્સના તટરક્ષકોએ આરોપ લગાવ્યો કે, ચીની તટરક્ષક દળનું જહાજ આજે વિવાદીત શોલ વિસ્તારમાં ગેરકાયદેસર પ્રવેશી તેના ત્રણ જહાજો પર પાણીનો મારો કર્યો, જેમાંથી ચીની જહાજે તેના એક જહાજને પણ ટક્કર મારી, જેના કારણે જહાજના એન્જીનમાં મોટું નુકસાન થયું છે. જહાજ અથડાયા બાદ બંને દેશોના સૈનિકો વચ્ચે મારામારી થઈ. ફિલિપાઈન્સે આરોપ લગાવ્યો કે, એક દિવસ પહેલા પણ ચીને વિવાદ શોલમાં આવી જ હરકતો કરી હતી.

ફિલિપાઈન્સે VIDEO પણ જારી કર્યો

તટરક્ષક દળના પ્રવક્તા કમોડોર જે તારિએલાએ કહ્યું કે, આ ઘટના સેકન્ડ થૉમસ શોલ પાસે બની છે. અહીં અમારા ફસાયેલા એક જહાજને ભોજન સહિતનો સામાન પહોંચાડવા અમારી પુરવઠો ભરેલી 2 બોટો અને એક જહાજ જઈ રહ્યા હતા, ત્યારે અધવચ્ચે જ તેને અટકાવવામાં આવ્યા હતા. આ ક્ષેત્ર એક ક્ષેત્રીય ચોકી છે. તટરક્ષક દળ દ્વારા એક વીડિયો ફુટેજ પણ જારી કરવામાં આવ્યા છે, જેમાં ચીનનું જહાજ ફિલિપાઈન્સનું પેટ્રોલિંગ જહાજ, બીઆરપી કાબરા અને એક પુરવઠો ભરેલી બોટ પર પાણીનો મારો કરતી જોવા મળી રહી છે, તો બીજીતરફ આ મામલે ચીનનો હજુ સુધી કોઈ જવાબ આવ્યો નથી.