ટ્રમ્પનો ફરી આબાદ બચાવ, અચાનક ખામી સર્જાતા મોન્ટેનામાં પ્રાઈવેટ જેટનું ઈમરજન્સી લેન્ડિંગ

Donald Trump Plane : ગોળીબારની ઘટનામાં આબાદ બચાવ બાદ અમેરિકાના પૂર્વ પ્રમુખ પર ફરી એકવાર મોટી આફત આવી અને ટળી પણ ગઈ. માહિતી મુજબ ટ્રમ્પના વિમાનમાં અચાનક જ ખામી સર્જાઈ હતી જેના લીધે ઈમરજન્સી લેન્ડિંગ કરાવાની ફરજ પડી. આ ઘટનામાં ટ્રમ્પનો આબાદ બચાવ થયો હતો. ટ્રમ્પ એક રેલીને સંબોધવા માટે મોન્ટેના જઈ રહ્યા હતા. 

એરપોર્ટ ઓથોરિટીએ શું કહ્યું? 

આ ઘટના વિશે જ્યારે એરપોર્ટ ઓથોરિટીનો સંપર્ક કરાયો તો ટેક્નિકલ કર્મચારીઓએ જણાવ્યું કે ટ્રમ્પના વિમાનમાં અચાનક જ ટેક્નિકલ ખામી સર્જાઈ હતી. સદભાગ્યે રોકી પર્વતની નજીકમાં જ એક એરપોર્ટ આવેલું હતું જેના લીધે ઈમરજન્સી લેન્ડિંગ કરાવામાં સફળતા મળી. બિલિંગ્સ લોગાન ઈન્ટરનેશનલ એરપોર્ટના અધિકારી જેની મોકલે કહ્યું કે ટ્રમ્પનું વિમાન મોન્ટેનાના બોઝમેન જવાનું હતું અને આ તેમનું પ્રાઈવેટ જેટ હતું. 

5 નવેમ્બરે અમેરિકામાં પ્રમુખ પદની ચૂંટણી 

ઉલ્લેખનીય છે કે ચાલુ વર્ષે અમેરિકામાં પાંચ નવેમ્બરે પ્રમુખ પદની ચૂંટણી યોજાવાની છે. આ ચૂંટણીમાં રિપબ્લિકન પાર્ટી વતી ડોનાલ્ડ ટ્રમ્પ અને ડેમોક્રેટિક પાર્ટી તરફથી ભારતીય મૂળના ઉમેદવાર કમલા હેરિસ રાષ્ટ્રપ્રમુખ બનવાની રેસમાં છે.