વડતાલ દ્વિશતાબ્દી મહોત્સવ માઇક્રો મેનેજમેન્ટનું ઉત્તમ ઉદાહરણ, રસોઈ માટે દરરોજ નાસિકથી આવે છે 50 ટન શાકભાજી

VadralDham Dwishantabdi Mahotsav: વડતાલ ખાતે દ્વિશતાબ્દી મહોત્સવ ઉજવાઈ રહ્યો છે. ત્યારે અહીં દેશ-વિદેશના ભક્તો ઉમટી રહ્યા છે. વડતાલ મંદિર બોર્ડ દ્વારા દ્વિશતાબ્દી મહોત્સવમાં આવતા ભક્તો માટે નિશુલ્ક ભોજન વ્યવસ્થા કરવામાં આવી છે. અહીં ઉત્સવ ગ્રાઉન્ડમાં 15થી વધુ ડોમમાં લાખો લોકોને ભોજન પીરસવામાં આવી રહ્યું છે.

3 લાખ લોકો માટે ભોજન વ્યવસ્થા

આજે વડતાલ દ્વિશતાબ્દી મહોત્સવનો બીજો દિવસ છે. અહીં લાખોની સંખ્યામાં દેશ-વિદેશના ભક્તો આવી રહ્યા છે. જેમના માટે ઉત્સવ ગ્રાઉન્ડમાં 15 વિશાળ ડોમમાં સાત્વિક ભોજન પીરસવામાં આવી રહ્યું છે. ભોજનાલયમાં 3 લાખ લોકો માટે સ્વયંસેવકો દ્વારા ભોજન તૈયાર કરવામાં આવી રહ્યું છે. આ માટે વહેલી સવારે 4 વાગ્યાથી તમામ સ્વયંસેવકો કામે લાગી જાય છે.

આ પણ વાંચો: વડતાલમાં બની રહ્યું છે અક્ષરભુવન, જુઓ સ્વામિનારાયણ ભગવાનના અકલ્પનીય મ્યુઝિયમની ઝાંખી

2500-3000થી વધુ સ્વયંસેવકો

અહીં 15 ડોમમાં ભોજન પીરસવામાં આવી રહ્યું છે. જેમાં 2500-3000થી વધુ સ્વયંસેવકો સેવામાં જોતરાયા છે. લાખો લોકોની રસોઈ તૈયાર કરવા માટે 1200થી વધુ બહેનો બે પાળીમાં માથે કેપ અને હાથમાં ગ્લવ્ઝ પહેરીને શાકભાજી સુધારવાથી કરિયાણાની સાફ-સફાઈ (ચાળવું) જેવા કામની સેવા આપી રહ્યા છે.

 600થી વધુ રસોયા

અહીં મહોત્સવમાં આવતા લાખો લોકોની રસોઈ બનાવવા માટે 600થી વધુ રસોઈયા કામ કરે છે. આ ઉપરાંત 150 માણસોના સ્ટાફ ડિશોની સાફ સફાઈ કરે છે. તો ઉત્સવમાં શેરડીનો રસ દરરોજ 10 ટન પ્રસાદી રૂપે પીરસવામાં આવી રહી છે. અહીં લોકોને બે મિષ્ઠાન, ફરસાણ, દાળ-ભાત, રોટલી, બે શાક અને છાશ પીરસવામાં આવી રહી છે.

આ પણ વાંચો: દ્વિશતાબ્દી મહોત્સવ: ભારત સરકારે વડતાલના સુવર્ણ મંદિરની ટપાલ ટિકિટ બહાર પાડી

દરરોજ નાસિકથી આવે છે 50 ટન શાકભાજી

લાખો લોકોની રસોઈ બનાવવા માટે અહીં દરરોજ નાસિકથી 50 ટન શાકભાજી આવે છે. જેમાં 10 હજાર કિલો દૂધી, 6 હજાર કિલો ટમેટા, 500 કિલો દાડમ, 200 કિલો વટાણા સહિતના શાકભાજી હોય છે. આ ઉપરાંત બટેકા ડીસાથી આવે છે અને શુદ્ધ ઘી અને સિંગતેલ વાપરવામાં આવે છે.