દોઢ કરોડની કાર બાદ ગોડાઉનમાં પણ આગ!, વડોદરામાં એક સપ્તાહમાં પાંચથી વધુ કારમાં આગ

Fire in Godown at Vadodara : વડોદરાના દરજીપુરા ખાતે ગઈ મધરાત બાદ અગરબત્તીના ગોડાઉનમાં ભીષણ આગ લાગતા ફાયર બ્રિગેડે બે કલાકની જહેમત બાદ આગ કાબૂમાં લીધી હતી. કારેલીબાગની પરાગ સોસાયટીમાં બે દિવસ પહેલા તપનભાઈ શાહની દોઢ કરોડની લેન્ડ રોવર કાર આગમાં ખાક થઈ ગઈ હતી. એજ તપનભાઈના ગોડાઉનમાં આગ લાગતા આશ્ચર્ય સર્જાયું છે. દોઢ કરોડની કારમાં લાગેલી આગના કારણ મુદ્દે હજુ તો પોલીસ તપાસ કરી રહીલ છે ત્યા તપનભાઈના ગોડાઉનમાં પણ આગ લાગવાની ઘટના બની. 

ગઈકાલે રાત્રે બે વાગ્યાના અરસામાં તપનભાઈ શાહના દરજીપુરા આરટીઓ પાસે ભાડે આપેલા અગરબત્તીના ગોડાઉનમાં કોઈ કારણસર આગ લાગી હતી. ફાયર બ્રિગેડે દોઢથી બે કલાક સુધી પાણીનો મારો ચલાવી આગ કાબુમાં લીધી હતી. 

આગમાં અગરબત્તીનું મટીરીયલ, મશીન તેમજ અન્ય સાધનોને ભારે નુકસાન થયું હતું. બે જ દિવસમાં એક જ વ્યક્તિને ત્યાં આગના બબ્બે બનાવ બનતા આશ્ચર્ય સર્જાયું છે. પોલીસે આ બાબતે સીસીટીવી ફૂટેજ મેળવવા માટે તજવીજ હાથ ધરી છે. જ્યારે ફોરેન્સિક નિષ્ણાતોની પણ મદદ લેવામાં આવી છે. 

એક સપ્તાહમાં પાંચથી વધુ કારમાં આગ

વડોદરામાં છેલ્લા એક સપ્તાહમાં કારમાં આગ લાગવાના અનેક બનાવો નોંધાયા છે. વડોદરાના રાત્રિ બજાર, ગોરવા આઈટીઆઈ વિસ્તારમાં બે કારમાં આગ લાગી હતી. તો માંજલપુરમાં શ્રેયસ સ્કૂલ નજીક એક કારમાં આગ લાગી હતી, જેના કારણે આ કારની પાસે પાર્ક કરેલી અન્ય કાર પણ આગની ઝપેટમાં આવી ગઈ હતી. જ્યારે કારેલીબાગ વિસ્તારની પરાગ સોસાયટીમાં દોઢ કરોડ રૂપિયાની કારમાં આગ લાગતા આખી કાર ખાક થઈ ગઈ હતી. આમ છેલ્લા અઠવાડિયામાં જ વડોદરામાં કારમાં આગ લાગવાના પાંચથી વધુ કિસ્સા સામે આવ્યા છે.