સયાજીગંજ પારસી અગિયારીમાં 102 વર્ષથી અખંડ અગ્નિ પ્રજ્વલિત છે

વડોદરા :  સયાજીગંજ વિસ્તારમાં આવેલી પારસી અગિયારીને ૩૧ જાન્યુઆરીએ ૧૦૨ વર્ષ પૂર્ણ થઇ રહ્યા છે તે નિમિત્તે આજે અગિયારી ખાતે ઉજવણીનું આયોજન કરાયુ હતું જેમાં વડોદરાના પારસી સમુદાયના લોકો ઉપરાંત શહેરના મહાનુભાવો ઉપસ્થિત રહ્યા હતાં.

અગિયારીનું નિર્માણ પૂર્ણ થતાં ૩૧ જાન્યુઆરી ૧૯૨૩ના રોજ તેનું ઉદ્ઘાટન કરાયુ હતું. બરોડા સ્ટેટના સ્ટેટ કોન્ટ્રાક્ટર ફરામજી કોન્ટ્રાક્ટરે પેસ્તનજી કોન્ટ્રાક્ટરના સુપરવિઝનમાં અગિયારીનું નિર્માણ કર્યુ હતું. ફરામજી કોન્ટ્રાક્ટરના પૌત્ર અને અગિયારીના વર્તમાન ટ્રસ્ટી નિકિતન કોન્ટ્રાક્ટરે કહ્યું હતું કે તે સમયે એટલે કે એક સદી પહેલા અગિયારીના નિર્માણ પાછળ રૃ.૧.૭૦ લાખનો ખર્ચ થયો હતો. અગિયારીની મુખ્ય ઇમારતમાં ચાર વિશાળ ખંડ છે. પ્રથમ ખંડમાં પારસીઓ જેની આરાધના કરે છે તે આતશ એટલે કે અગ્નિ પ્રજ્વલિત છે. આ આતશની ખુબી એ છે કે ઇરાનથી પારસીઓ અગ્નિ ઉદવાડા લાવ્યા હતા અને ત્યાં સ્થાપના કરી હતી જેને આતશ બહેરામ કહેવાય છે. 

ઉદવાડા ખાતે આતશ બહેરામમાંથી અગ્નિ વડોદરા લવાયો હતો

અમદાવાદની અગિયારીના દસ્તુરજી ડો.ખુશરુ હોમી ઘડિયાલીએ કહ્યું હતું કે ભારતના કલ્ચરમાં વણાઇ ગયેલા પારસીઓની સાચી વ્યાખ્યા તો પા-ઋષિ છે.  પારસી એટલે જેમાં ઋષિ જેવા ગુણ છે, પા ભાગના ઋષિ છે. વડોદરામાં ગાયકવાડનું શાસન હતુ ત્યારે શાસનનો મોટાભાગનો વહિવટ પારસીઓ કરતા હતા એટલે ગાયકવાડ સાથે પારસીઓનો અતૂટ સંબંધ છે.

102 વર્ષ પહેલા વોકલ ફોર લોકલનો વિચાર મુકાયો હતો

આજકાલ વોકલ ફોર લોકલનો નારો બહુ ચાલે છે હકિકતે આ વિતાર મારા દાદાજી ફરમાજી કોન્ટ્રાક્ટરે તે સમયે અગિયારીના બાંધકામ વખતે અમલમાં મુક્યો હતો. નિર્માણ વખતે તેઓએ એ વાતનો ખાસ વિચાર કર્યો હતો કે સ્થાનિક ઇંટોના ભઠ્ઠાવાળાને અને કારીગરોને રોજગાર મળે એટલે અગિયારીની ડિઝાઇન જ એ રીતે કરી કે તેમાં મહતમ ઇંટોનો ઉપયોગ થાય. આજે પણ જોઇ શકાય છે કે ૧૦૨ વર્ષ બાદ પણ આ ઇમારત અડીખમ ઉભી છે.