એ.ટી.એમ.માં મેટલની પટ્ટી લગાવી ગ્રાહકના રૃપિયાની ચોરી

વડોદરા,એ.ટી.એમ.માં મેટલની પટ્ટી લગાવી ગ્રાહકે ઉપાડેલા રૃપિયા બંટી બબલીની જોડી ચોરી જાય છે. તે અંગે સીસીટીવી ફૂટેજના આધારે વારસિયા પોલીસે આરોપીઓની શોધખોળ હાથ ધરી છે.

છોટાઉદેપુર જિલ્લાના કવાંટ તાલુકાના તાળકાશલા ગામમાં રહેતો સુરેશ હરિશભાઇ રાઠવા હીટાચી પેમેન્ટ સર્વિસ પ્રા.લિ.માં ચેનલ એક્ઝિક્યુટિવ તરીકે નોકરી કરે છે. વારસિયા પોલીસ સ્ટેશનમાં તેણે ફરિયાદ નોંધાવી જણાવ્યું છે કે, અમારી કંપની સ્ટેટ બેન્ક, એક્સિસ બેન્ક, આઇ.સી.આઇ.સી.આઇ. બેન્ક, બેન્ક ઓફ ઇન્ડિયા, ઇન્ડસઇન્ડ બેંકના એ.ટી.એમ.ના સર્વે તથા મેન્ટેનન્સનું કામ કરે છે. ગઇકાલે સાંજે સાત વાગ્યે મારા મોબાઇલ ફોન પર કંપનીમાંથી કોલ આવ્યો હતો. કંપની તરફથી કહેવામાં આવ્યું હતું કે, હરણી વારસિયા રીંગ રોડ પર ચતુરભાઇ પાર્ક નજીકના એક્સિસ બેન્કના એ.ટી.એમ.માં કોઇ ગેરકાયદે પ્રવૃત્તિ થઇ રહી છે. જેથી, હું તાત્કાલિક ત્યાં પહોંચ્યો હતો.પરંતુ, એ.ટી.એમ.માં કોઇ છેડછાડ થઇ હોવાનું જણાઇ આવ્યું નહતું. એ.ટી.એમ.ની બહાર ઉભેલા ગૌતમ માછીને પૂછતા તેણે જણાવ્યું હતું કે, મેં એ.ટી.એમ.માંથી એક હજાર ઉપાડવા માટે ટ્રાન્જેક્શન કર્યુ હતું.   રૃપિયા બહાર આવ્યા નથી. પરંતુ, મારા એકાઉન્ટમાંથી રૃપિયા ડેબિટ થયાનો મેસેજ આવ્યો છે. મેં કંપનીના સીસીટીવી કેમેરાનું મોનિટરીંગ કરનાર પાસે ફૂટેજ મંગાવી ચેક કરતા જાણવા મળ્યું કે,સાંજે છ વાગ્યે એક વ્યક્તિ સફેદ ચેક્સવાળું શર્ટ અને કાળા કલરનું પેન્ટ પહેરીને આવે છે.તેના  હાથમાં મેટલની એક પટ્ટી હતી. તેણેે આ  પટ્ટી એ.ટી.એમ.ના ડિસ્પેન્સરમાં ફિટ કરી દીધી હતી. તેના કારણે પૈસા બહાર આવતા નથી. ગૌતમ માછી એ.ટી.એમ.ની બહાર નીકળી જાય છે. ત્યારપછી એક મહિલા લાલ કલરની ટી શર્ટ અને મોંઢા પર પીળા કલરની ઓઢણી બાંધીને અંદર આવે છે. ડિસ્પેન્સરમાં લગાવેલી પટ્ટી હટાવીને પૈસા તથા પટ્ટી લઇને બહાર નીકળી જાય છે. બનાવ અંગે વારસિયા પોલીસે વધુ તપાસ હાથ ધરી છે.