સુરતમાં તમંચે પે ડિસ્કો, ડાન્સર સાથે ઝૂમતા ભાજપના કાર્યકરનો વીડિયો વાઈરલ

BJP Worker Dance Viral Video : સુરત શહેર ભાજપના વધુ એક કાર્યકરની ભવાઈ સોશિયલ મિડીયામાં વગોવાઈ રહી છે. ઉત્તર ભારતીય સમાજમાંથી આવતા ભાજપના કાર્યકર અને શિક્ષણ સમિતિના સભ્ય શુભમ ઉપાઘ્યાયના ભાઈનો હવે સોશિયલ મિડીયામાં વીડિયો વાઈરલ થયો છે. હાથમાં રિવોલ્વર લઈ રૂમમાં ડાન્સર સાથે ઝૂમી રહેલો સુજીત ઉપાઘ્યાય પણ ડિંડોલી વિસ્તારમાં ભાજપનો સક્રિય કાર્યકર છે. ઉપાઘ્યાયની ટપોરીછાપ હરકતથી શહેર ભાજપ વધુ એક વખત ક્ષોભજનક સ્થિતિમાં મુકાયું છે.

શિક્ષણ સમિતિના સભ્યનો ભાઈ સુજીત ઉપાઘ્યાય રૂમમાં ડાન્સર સ્ટાઇલ મારતા નજરે પડયો

સુરત મહાપાલિકાના કોર્પોરેટર અમિતસિંગ રાજપૂતના દૂધ પૌંઆ, દિપીકા પટેલ આપઘાત કેસમાં નગરસેવક ચિરાગ સોલંકી સામે કચવાટ, ડેનીશ કેક શોપના માલિક ઉમેશ તિવારી સહિતના કાર્યકરોને પગલે શહેર ભાજપનું નામ વગોવાઈ રહ્યું છે. સત્તાના મદમાં છકી ગયેલા કાર્યકરોના વાણી, વર્તન અને વ્યવહારથી સામાન્ય નાગરિકો ઉવાચ થઈ ચૂક્યા છે. હવે શિક્ષણ સમિતિના સભ્ય શુભમ ઉપાઘ્યાયના સગા ભાઈએ કરેલું પરાક્રમ સોશિયલ મિડીયામાં વાઈરલ થયું છે. 

ડાન્સર સાથે ઠુમકા મારી રહેલા ભાજપના કાર્યકર સુજીત ઉપાઘ્યાયનો વીડિયો વાઈરલ થયો છે. હાથમાં રિવોલ્વર પકડી યુપીવાસી સ્ટાઈલમાં બરાબર ઝૂમી રહેલા પાર્ટીના શિષ્ટબદ્ધ કાર્યકરના અવિવેકી સંસ્કાર જોઈ ભાજપના કાર્યકરો અને નેતાઓને પણ હવે આ જ જોવાનું બાકી હતું! એવું કહી કટાક્ષ કરી રહ્યાં છે.

સામાન્ય નાગરિકો જાહેરમાં બર્થ-ડે સેલિબ્રેશન કરે તો કાયદાનો પાઠ ભણાવતી પોલીસ હવે સોશિયલ મિડીયામાં વાઈરલ થયેલો સુજીત ઉપાઘ્યાયનો વીડિયો જોઈ કાયદેસરની કાર્યવાહી કરશે કે પછી? તેને લઈ અનેક અટકળો વહેતી થઈ છે.