હદ થઈ ગઈ: સુરત પાલિકાના ડ્રેનેજના કોન્ટ્રાક્ટરે ઘર દીઠ રૂ. 3500 ઉઘરાવ્યા

Surat Corporation : સુરત પાલિકામાં અત્યારસુધી પાલિકાના કર્મચારી કે કોર્પોરેટરો જ લોકો પાસે પૈસા ઉઘરાવતા હોવાની ફરિયાદ થઈ હતી. પરંતુ આજે વરાછા ઝોનમાં પાલિકાના ડ્રેનેજના કોન્ટ્રાક્ટર દ્વારા પૈસા ઉઘરાવ્યા હોવાની ગંભીર ફરિયાદ બહાર આવી છે. વરાછા ઝોનમાં એક રહેણાંક સોસાયટી પાસે કોન્ટ્રાક્ટર 3500 રૂપિયા સુધીના પૈસા ઘર દીઠ ઉઘરાવ્યા હોવાની ફરિયાદ થઈ હતી.

પાલિકાના વિપક્ષી કોર્પોરેટર સ્થળ પર ગયાં હતા અને કોન્ટ્રાકટરને બોલાવીને લોકો પાસે ઉઘરાવેલા પૈસા પરત આપવા માટે અલ્ટીમેટમ આપ્યું છે અને બીજી વાર આવું થશે તો ગંભીર પરિણામ ભોગવવાની ચીમકી આપી છે. જોકે, કોન્ટ્રાક્ટર દ્વારા આવી રીતે પૈસા ઉઘરાવાતા હોવાની ગંભીર ફરિયાદ બાજ તંત્ર પણ ચોંકી ગયું છે. 

પાલિકાના વરાછા ઝોન વિસ્તારમાં આવેલ રૂપાલી સોસાયટીમાં સુરત મહાનગરપાલિકા દ્વારા ડ્રેનેજની લાઈનની કામગીરી હાથ ધરવામાં આવી છે. આ કામગીરી દરમિયાન કોન્ટ્રાકટર દ્વારા ઘર દીઠ 2500થી 3500 રૂપિયાની ઉઘરાણી કરવામાં આવી હોવાની ફરિયાદ થઈ હતી. આ ફરિયાદ બાદ પાલિકાના વિપક્ષી કોર્પોરેટર કુંદન કોઠીયા સ્થળ પર પહોંચી ગયાં હતા.

તેઓએ ગઈકાલે રાત્રે તાત્કાલિક સોસાયટી ખાતે પહોંચ્યા હતા અને ત્યાં જ કોન્ટ્રાક્ટરને બોલાવવામાં આવ્યો હતો. તેઓએ કોન્ટ્રાક્ટરે લોકો પાસે લીધેલા રૂપિયા પરત આપવા માટે કોન્ટ્રાક્ટરને અલ્ટીમેટમ આપ્યું હતું.

જેને પગલે કોન્ટ્રાક્ટર દ્વારા પણ તમામ રહેવાસીઓને રૂપિયા પરત આપી દેવામાં આવ્યા હતા. ત્યારબાદ બીજી વખત આ પ્રકારે સ્થાનિક લોકો પાસેથી રૂપિયા ઉઘરાવવામાં આવશે તો તે અંગે ગંભીર પરિણામો ભોગવવા કોન્ટ્રાક્ટરને ચીમકી આપવામાં આવી હતી.