કેટલાક તાલુકાના પ્રા.શિક્ષકોનો હજુ પણ પગાર થયો નથી

- વહિવટી ત્રુટીઓને લીધે અકારણ અગવડતા

- પ્રા.શૈક્ષિક મહાસંઘ દ્વારા પગારની નિયમિતતાને લઇ ડીડીઓને આવેદન અપાયું

ભાવનગર જિલ્લામાં વિવિધ વિભાગના ઘણાં કર્મચારીઓ ફરજ બજાવે છે તેમાંથી મોટાભાગના વિભાગોમાં ૧ થી ૩ તારીખ સુધીમાં પગાર થઇ જતો હોય છે. જિલ્લામાં શિક્ષકોનો સમૂહ ખૂબ મોટો છે ત્યારે અલગ અલગ તાલુકાઓમાં શિક્ષકોના પગાર સમયસર કરવા બાબતે વિસંગતતા જોવા મળે છે. જિલ્લામાંથી તાલુકામાં ૧ થી ૩ તારીખ સુધીમાં ડ્રાફ્ટ મોકલી આપવામાં આવે તો તાલુકામાંથી જરૂરી કાર્યવાહી કરી મોડામાં મોડા પાંચ તારીખ સુધીમાં શિક્ષકોના પગાર થઇ શકે. આ મહિનામાં આજની તારીખે પણ અમુક તાલુકાઓમાં પગાર થયેલ નથી. વહિવટી ત્રુટીને લીધે અકારણ પગાર મોડો થતો હોય જે અંગે પ્રાથમિક શૈક્ષિક મહાસંઘ દ્વારા ડીડીઓને આવેદનપત્ર આપી રજૂઆત કરી હતી.