કોમર્સ ફેકલ્ટીમાં તમામ વર્ષના વિદ્યાર્થીઓના શિક્ષણનો એક સાથે ૬ જાન્યુઆરીથી પ્રારંભ થશે

વડોદરાઃ એમ.એસ.યુનિવર્સિટીની કોમર્સ ફેકલ્ટીમાં કોરોના બાદ પહેલી વખત એફવાયનું બીજું સેમેસ્ટર જાન્યુઆરી મહિનામાં શરુ થવા જઈ રહ્યું  છે.

કોમર્સ ફેકલ્ટીમાં પહેલા સેમેસ્ટરની તમામ ફાઈનલ પરીક્ષાઓ પૂર્ણ થઈ ગઈ છે અને ૬ જાન્યુઆરીથી એફવાયથી માંડી એમ કોમ સુધી ૧૫૦૦૦ જેટલા વિદ્યાર્થીઓના બીજા સેમેસ્ટરના શિક્ષણનો એક સાથે પ્રારંભ થશે.

સૌથી મહત્વની વાત એ છે કે, એફવાયના વિદ્યાર્થીઓનું પણ બીજું સેમેસ્ટર જાન્યુઆરીથી શરુ થશે.કોરોનાના કારણે કોમર્સ ફેકલ્ટીમાં એફવાયના વિદ્યાર્થીઓનુ ટાઈમ ટેબલ ખોરવાઈ ગયું હતું અને સત્તાધીશો તેને રાબેતા મુજબ કરવામાં અત્યાર સુધી નિષ્ફળ ગયા હતા.જેના કારણે એફવાયના વિદ્યાર્થીઓની પહેલા સેમેસ્ટરની પરીક્ષા જ  ફેબુ્રઆરી માર્ચમાં લેવાતી હતી અને બીજા સેમેસ્ટરની પરીક્ષાનું જુલાઈ મહિનામાં આયોજન થતું હતું.આ વર્ષથી સ્થિતિ બદલાઈ છે અને કદાચ દાયકાઓ બાદ પહેલી  વખત તમામ વર્ષોના વિદ્યાર્થીઓનું શિક્ષણ એક સાથે એક જ તારીખે શરુ થશે અને તેના કારણે હવે એફવાયના વિદ્યાર્થીઓની આગામી બેચના એડમિશન પણ સમયસર થશે.