જામજોધપુર પાસે ચાર સવારીમાં જઇ રહેલા યુવાનો નડ્યો અકસ્માત : એકનું મોત, ત્રણ ઈજાગ્રસ્ત

Jamnagar Accident : જામજોધપુરના પાટણ ગામના રસ્તા પરથી બાઈક ઉપર ચાર સવારીમાં જઈ રહેલા યુવાનોને અકસ્માત નડયો હતો. જેમાં ત્રણને શરીરે નાની મોટી ઈજા પહોંચતા પ્રાથમિક સારવારઅર્થે ખસેડાયા હતા. આ બનાવમાં બાઈક ચાલક યુવાનનું ગંભીર ઈજાના કારણે મૃત્યુ નિપજયું હતું. બીજી તરફ અકસ્માતના આ બનાવની જાણ થતાં સ્થાનિક પોલીસ કાફલો ઘટના સ્થળે દોડી ગયો હતો અને મૃતક બાઈક ચાલક સામે ફરિયાદના આધારે કાર્યવાહી હાથ ધરી હતી.

જામજોધપુરના પરડવા ગામે આવેલ રાજુભાઈ કારાવદરાની વાડીએ રહેતો મુકેશ ઈન્દરસિંહ બધેલ નામનો યુવાન બાઈક ચલાવી અત્રેના પાટણ ગામના રોડ પરથી રાહુલ કેરમભાઈ બધેલ, આકાશ મુકામભાઈ બધેલ તથા સુનિલ મુકામભાઈ બધેલ નામના અન્ય ત્રણ શખ્સને બેસાડી જતો હોય, દરમ્યાન પોતાનું વાહન પુરઝડપે અને ગફલતભરી રીતે ચલાવી અકસ્માત સર્જતા રાહુલ, આકાશ અને સુનિલ નામના ત્રણેય યુવાનને શરીરે છોલછાલ અને મુઢ ઈજાઓ પહોંચાડી હતી. તેમજ આ બનાવમાં ગંભીર રીતે ઘાયલ થયેલા મુકેશ બધેલનું મોત નિપજયું હતું. બીજી તરફ રાહુલ નામના યુવાને જામજોધપુર પોલીસમાં મૃતક મુકેશ બધેલ સામે ફરિયાદ નોંધાવતા પોલીસ આગળની તપાસ ચલાવી રહી છે.