જેઠ પૂનમે યાત્રાધામ ડાકોરમાં ભક્તોનું ઘોડાપૂર ઉમટ્યું, ધક્કામુકી સર્જાતા ભક્તોમાં રોષ

શ્રી રણછોડજી મહારાજનું મંદિર વહેલી સવારે ૫ વાગ્યે ખુલી ગયું હતું. ત્યારે રાજાધીરાજના દર્શન માટે મંગળા આરતીથી ડાકોરના પ્રવેશ માર્ગો પર ભીડ જોવા મળી હતી. જે ભીડ બપોરના એક વાગ્યા સુધી રહી હતી. ડાકોરમાં છેલ્લા ઘણા સમયથી મંદિર ચોક વિસ્તારમાં કોટન દરવાજા પાસે મહિલાઓ બાળકો અને વિકલાંગોના જવાના ગેટ પાસે ખૂબ ભીડ થઈ જાય છે, જેમાં કેટલાય બાળકો મહિલાઓ અને વૃદ્ધો દબાઈ જવાની ઘટના બની છે. આજે પણ સવારે દશવાગ્યા ના અરસામાં કેટલાય ભક્તો દબાયા હોવાની બુમો સ્થાનિક વેપારીઓએ પાડીને ભીડ ઓછી કરવા માટે પોલીસને બોલાવી હતી.

અગાઉ પણ આવી ઘટના બની છે છતાં સરકારના અધિકારીઓને આવી ફરિયાદોના નિવારણમાં કોઈ લાભ થવાનો ના હોવાથી કોઈ કાર્યવાહી કરાતી નથી. હોળી પૂનમ સિવાય ડાકોરમાં યોગ્ય બંદોબસ્ત અને આયોજન કરાતું નહીં હોવાનું ભક્તોના ધ્યાને આવ્યું હતું. સુરતથી પૂનમ ભરવા આવતા નેમધારી ભક્તોનું કહેવું છે કે, ડાકોર સંઘ લઈને તેઓ ૧૫ વર્ષથી આવે છે. છતાં ડાકોરમાં કોઈ સુધારો થયો હોય તેવું દેખાયું નથી. યાત્રા ધામોનો વિકાસ થઈ રહ્યો છે પરંતુ, ડાકોર માટે ઓરમાયું વર્તન કેમ રાખવામાં આવે છે.