વડોદરામાં કારમાં આગનો સિલસીલો જારી, કારેલીબાગમાં નવીનક્કોર કાર આગમાં ખાક

Vadodara : વડોદરામાં છેલ્લા ચાર દિવસથી રોજ કારમાં આગ લાગવાના બનાવો બની રહ્યા છે ત્યારે આજે સતત ચોથા દિવસે કારેલીબાગ વિસ્તારમાં એક મહિના પહેલાં લીધેલી કારમાં આગ લાગતા આખી કાર ખાક થઈ ગઈ હતી.

કારેલીબાગ ચંદ્રાવલી સોસાયટી પાછળ પરાગ સોસાયટીમાં રહેતા તપન શાહે એક મહિના પહેલાં લેન્ડરોવર ડિફેન્ડર કાર ખરીદી હતી. આ કારમાં તેઓ બહાર જવા માટે નીકળતા હતા તે વખતે નજીકમાં રહેતા ડોક્ટરે કારમાંથી ધુમાડા નીકળતા હોવાની જાણ કરી હતી.

તપનભાઈ એ હિંમત કરીને કાર નજીકના ગ્રાઉન્ડમાં લઈ જવાનો પ્રયત્ન કર્યો હતો. પરંતુ આગ વધુ ભડકતા લોકોએ બુમરાણ મચાવી તેઓને બહાર નીકળી જવા માટે કહ્યું હતું. સારા નસીબે કાર્ડ લોક નહીં થઈ જતા તેઓ બહાર નીકળવામાં સફળ રહ્યા હતા અને જોત જોતામાં આખી કાર ભડભડ સળગી ગઈ હતી. ફાયર બ્રિગેડે પોણો કલાકની જહેમત બાદ આગ કાબૂમાં લીધી હતી.

નોંધનીય છે કે સતત ત્રણ દિવસમાં કારમાં આગ લાગવાના ત્રણ બનાવો બન્યા હતા અને તેમાં ચાર કારને નુકસાન થયું હતું. આજે ચોથા દિવસે પાંચમી કારમાં આગ લાગી છે.