વેરાવળમાં મેગા ડિમોલીશન : 45 મકાનો પર ફરી વળ્યું બૂલડોઝર

સરકારી જગ્યા ઉપર ગેરકાયદેસર બની ગયેલા પાકાં મકાનો તોડી પડાયાં

શાહીગરા કોલોનીમાં વરસાદી પાણીનાં વહેણમાં થયેલાં દબાણો હટાવી રૂા.૩.૫ કરોડની જમીન ખુલ્લી કરાવતી નગરપાલિકા

વેરાવળના વોર્ડ નં.૬ માંશાહીગરા કોલોનીમાં મહેક સ્કુલની બાજુમાં રેલ્વેની દિવાલને અડીનેઆવેલ પડતર સરકારી જમીન ઉપરથી નિકળતા વરસાદી પાણીના વહેણમાં ૪૫ જેટલા પાકા મકાનો ગેરકાયદેસર રીતે બની ગયા હતા. જેને દુર કરવા માટે મામલતદાર દ્વારા સ્થળ મુલાકાત કરીને કબ્જા ધારકોને અઠવાડિયામાં મકાનો હટાવવા સુચના આપેલ તેમ છતાં કોઈએ મકાનો હટાવ્યા ન હતા. જેથી ડિમોલેશન કરવાનું પાલિકાએ આયોજન કરતા નગરપાલિકાનો સ્ટાફ ૧ જેસીબી અને ૨૨ ટ્રેક્ટરો સાથે દબાણો હટાવવા પહોચી ગયો હતો. જ્યાં સરકારી જમીનમાં ગેરકાયદેસર બની ગયેલા બાંધકામો ઉપર નગરપાલિકાના બુલડોઝરો ફરી વળ્યા હતા.

આ કામગીરીમાં ૪૫ જેટલા પાકા મકાનો દુર કરીને ૩૫૮૪ ચો.મી.સરકારી જમીન ખુલ્લી કરાવવામાં આવી છે. આ જમીનની બજાર કિંમત રૂ.૩.૫ કરોડ જેવી થાય છે.  પોલીસના રક્ષણ વગર પણ નગરપાલિકાએ આયોજન મુજબ ડિમોલેશનની કામગીરી હાથ પરી હતી.