આડેસર ચેક પોસ્ટ પર ટ્રકમાંથી 84 હજારની કિંમતનો દારૂ ઝડપાયો

દારૂની ૨૮૮ બોટલો, ગુવારનાં ૪૮૯ કટ્ટા સહીત કુલ ૪૯.૭૬ લાખનો મુદ્દામાલ કબ્જે કરાયા

પ્રાપ્ત માહિતી અનુસાર કચ્છનાં પ્રવેશદ્વાર સમાન આડેસર ચેક પોસ્ટ પર આડેસર પોલીસે તપાસ દરમિયાન ટ્રક નં આરજે ૦૪ જીબી ૬૨૧૭ને ઝડપી પાડયો હતો. જેમાં પોલીસે ટ્રકમાં તપાસ કરતા ગોવારનાં કટ્ટા નીચેથી સંતાડીને રાખેલી ભારતીય બનાવટની વિદેશી શરાબની ૨૮૮ બોટલો જેની કિંમત રૂ. ૮૪,૦૦૦નો મુદ્દામાલ મળી આવ્યો હતો. જેથી પોલીસે દારૂની સાથે ગુવારનાં ૪૮૯ કટ્ટા, બે મોબાઈલ ફોન અને ટ્રક સહીત કુલ રૂ. ૪૯,૭૬,૪૨૦નો મુદ્દામાલ કબ્જે કરી ટ્રકનાં ચાલક ખેતારામ મુલારામ જાટ (રહે. ચોહતન બાડમેર) અને લાભુરામ પદમારામ જાટ (રહે. આલમસર બાડમેર) તેમજ દારૂનો જથ્થો મોકલનાર કાનારામ જાટ અને દારૂનો જથ્થો મંગાવનાર વિરુદ્ધ આડેસર પોલીસ મથકે ફરિયાદ નોંધી વધુ તપાસ હાથ ધરી હતી.