ખંભાળિયામાં એસટી બસનાં ડ્રાઈવર દ્વારા મહિલા કંડકટર પર દુષ્કર્મ

સહકર્મી મહિલા વશ નહીં થતાં ધાક-ધમકી આપીને શિકાર બનાવી

ઘણા સમયથી મહિલા કંડકટરને મોબાઈલ ફોનમાં ફોટા-વીડિયો હોવાનું કહી શારીરિક શોષણ કરનાર ડ્રાઈવરની અટકાયત

વિગત મુજબ મધ્ય ગુજરાત તરફના જિલ્લામાં રહેતી અને પરિણીત એવી એક યુવતી એસટી વિભાગમાં કંડકટર તરીકે ફરજ બજાવતી હોય, તેણી ખંભાળિયામાં એક મકાન ભાડે રાખીને રહેતી હતી. તેની સાથે બસમાં કામ કરતા ડ્રાઇવર પુંજાભાઈ રામાભાઈ ઉલવા (રહે. યોગેશ્વર નગર, ખંભાળિયા)ને કંડકટર મહિલા સાથે વાતચીતનો વ્યવહાર હતો. આ બંનેની ફરજના સમયગાળા દરમ્યાન એસ.ટી. બસ ચાલક પુંજાભાઈ દ્વારા કોઈના કોઈ બહાને મહિલા કંડકટર સાથે આત્મીયતા વધારવાનો પ્રયાસ કરવામાં આવતો હતો.

આટલું જ નહીં, તેના દ્વારા મહિલાને શરીર સંબંધ બાંધવા માટે કહેવામાં આવતા તેણીએ ના કહી દીધી હતી. પરંતુ તેણે મહિલાને મારી નાખવાની  તેમજ નોકરીમાંથી છૂટા કરાવી દેવાની ધમકી આપી મરજી વિરુદ્ધ દુષ્કર્મ ગુજારવામાં આવ્યું હોવાની ધોરણસર ફરિયાદ  મહિલાએ ખંભાળિયા પોલીસ મથકમાં નોંધાવી છે.

આ ઉપરાંત તેના મોબાઈલમાં મહિલાના ફોટા અને વિડિયો હોવાનું કહી  અવારનવાર ધમકી આપી, બળજબરીપૂર્વક સંબંધ રાખી  દુષ્કર્મ ગુજારવામાં આવતા આ સમગ્ર બનાવ અંગે મહિલાએ પોતાની માતાને જાણ કરી હતી અને ત્યાર બાદ આ સમગ્ર મામલો ખંભાળિયા પોલીસ મથકે પહોંચ્યો હતો. જેથી ખંભાળિયા પોલીસે મહિલાની ફરિયાદ પરથી એસટી બસના ડ્રાઇવર પુંજાભાઈ રામાભાઈ ઉલવા સામે જુદી જુદી કલમ હેઠળ ગુનો નોંધી, તેની અટકાયત કરી હતી.