માત્ર ૧૫ મિનિટના ગાળામાં કારેલીબાગ અને આજવારોડ પર અછોડા તૂટયા

વડોદરા,આજવા રોડ મુખીનગર પાસે તથા કારેલીબાગ  પાણીની ટાંકી રોડ પર ભર બપોરે માત્ર ૧૫ મિનિટના ગાળામાં બાઇક સવાર આરોપીઓ બે મહિલાના ગળામાંથી અછોડો તોડી આરોપીઓ ફરાર થઇ ગયા હતા.  પોલીસે સીસીટીવી ફૂટેજના આધારે આરોપીઓની શોધખોળ હાથ ધરી છે.

આજવારોડ મુખીનગર પાસે નરસિંહ ધામ સોસાયટીમાં રહેતા દિપીકાબેન નાગેન્દ્રભાઇ સોલંકી તથા તેમના નણંદ હેમાબેન ભાવેેશભાઇ  સોલંકી ગઈકાલે બપોરે પોણા ત્રણ વાગ્યે ઘરેથી ચાલતા નીકળે તેમના દીકરાઓને માય શાનેન સ્કૂલે લેવા માટે જતા હતા. તે સમયે મુખીનગર માધવ રેસિકોમ પાસે બે અજાણ્યા આરોપીઓ સ્પોર્ટ્સ મોટરસાયકલ લઈને આવ્યા હતા અને તેમની બાજુમાં ચલાવી પાછળ બેઠેલા આરોપીએ દિપીકાબેનને ધક્કો મારતા તેઓ પાછળ ફર્યા હતા તે સમયે આરોપીએ તેમના ગળામાંથી સોનાનું પાંચ ગ્રામનું મંગળસૂત્ર આંચકી લીધુ હતું અને ભાગી ગયા હતા. બાઈક પર પાછળ બેઠેલા આરોપીએ કાળા તથા સફેદ કલરના પટ્ટાવાળો ટીશર્ટ અને કાળું પેન્ટ પહેર્યુ હતું. તેમજ મોંઢા પર માસ્ક પહેર્યુ હતું. તેઓ પ્રભુજી પાર્ટી પ્લોટ તરફ ભાગી ગયા હતા.બનાવ અંગે બાપોદ પોલીસે ગુનો દાખલ કરી આરોપીની  શોધખોળ હાથ ધરી છે.

જ્યારે અન્ય એક બનાવમાં કારેલીબાગ પાણીની ટાંકી રોડ પર પ્રાર્થના ફ્લેટમાં રહેતા બેલાબેન જયનભાઇ સોપારકર હાલોલ ખાતે આવેલી આસોજ સોફ્ટ કેપ્સમાં નોકરી કરે છે. તેમના પતિનું ૧૨ વર્ષ અગાઉ મરણ થયું છે. ગઈકાલે બપોરે તેઓ ઘરેથી મોપેડ લઇને કારેલીબાગ બંસલ મોલમાં ગયા હતા. ત્યાંથી તેઓ ઉત્કર્ષ પેટ્રોલપંપ પર પેટ્રોલ ભરાવીને કારેલીબાગ આનંદનગર પાસે આવેલા વિનાયક સુપર માર્કેટમાં ગયા હતા. પરંતુ, સ્ટોર બંધ હોઇ તેઓ ઘરે પરત જતા હતા. અમિતનગરથી  પાણીની ટાંકી તરફ જતા  રોડ પર તેમના મોપેડની પાછળ એક બાઇક પર બે આરોપીઓ આવ્યા હતા.પાછળ બેસેલા આરોપીએ સફેદ કલરનો શર્ટ તથા ગ્રે કલરનું પેન્ટ પહેર્યુ હતું. પાછળ બેસેલા આરોપીએ તેમના ગળામાંથી સોનાની બે તોલા વજનનો અછોડો કિંમત રૃપિયા ૭૫ હજારનો આંચકી લીધો હતો.