જામનગરમાં યોજાયેલી મેગા વિડિયો શિબિરમાં સેંકડો લોકોએ ધ્યાન યોગનો લાભ લીધો

જામનગરમાં હિમાલયન સમર્પણ ધ્યાન યોગ પરિવાર દ્વારા આયોજિત મેગા વિડિયો શિબિરને ભવ્ય સફળતા મળી છે. ૬ થી ૧૩ જાન્યુઆરી દરમિયાન લેઉવા પટેલ સમાજ, રણજીતનગર, જામનગર ખાતે યોજાયેલી આ શિબિરમાં સેંકડો લોકોએ ભાગ લીધો હતો. પૂજ્ય ગુરુદેવ શ્રી શિવકૃપાનંદ સ્વામીજીના માર્ગદર્શન હેઠળ યોજાયેલા આ શિબિરમાં લોકોએ ધ્યાન યોગના લાભો લીધા હતા. 

શિબિર દરમિયાન સેંકડો નવા સાધકો અને સાધિકાઓએ ગુરુતત્વ સાથે જોડાઈને પરમ તત્વને પામવા તરફ કદમ માંડેલ છે. શિબિરના અંતે સર્વે સહભાગીઓને ૪૫ દિવસનું વૈયક્તિક કે સામૂહિક ગહન ધ્યાન અનુષ્ઠાન કરવા માટે પ્રેરિત કરવામાં આવ્યા હતા. આ ઉપરાંત, દરરોજ ઓછામાં ઓછી ૩૦ મિનિટ સુધી ધ્યાન કરવા અને હિમાલયન સમર્પણ ધ્યાન યોગના સામૂહિકતામાં થતા ધ્યાન સેન્ટરોમાં જોડાવા માટે પણ આહ્વાન કરવામાં આવ્યું હતું.

આ આઠ દિવસીય શિબિરમાં વિવિધ રાજકીય હોદ્દેદારો, સંતો, સાધ્વીઓ, ધર્મ સંસ્થાઓના આગેવાનો, સમાજના આગેવાનો, બેંક ડિરેક્ટરો તેમજ યોગ બોર્ડ, શિક્ષણ અને પોલીસ વિભાગના તથા અન્ય વ્યવસાયોના શ્રેષ્ઠીઓ વિશેષ મહેમાન તરીકે ઉપસ્થિત રહ્યા હતા. 

આ શિબિર દ્વારા લોકોમાં આધ્યાત્મિક જાગૃતિ લાવવાનો અને તેમના જીવનમાં સકારાત્મક પરિવર્તન લાવવાનો પ્રયાસ કરવામાં આવ્યો હતો.