જામનગરમાં સરકારી કચેરીમાં ટુ વ્હીલરમાં આવતા કર્મચારીઓ સામે સતત બીજા દિવસે ટ્રાફિક ઝુંબેશ અવિરત ચાલુ રખાઇ

Jamnagar Helmet Drive : ગુજરાત રાજ્ય સરકાર દ્વારા તમામ સરકારી કચેરીમાં ફરજ પર આવતા કર્મચારીઓ કે જેઓ પોતાના ટુ વ્હીલરમાં આવતી વખતે હેલ્મેટ પહેરીને ફરજિયાત આવવાની જાહેરાત કરાયાના અનુસંધાને ગઈકાલે જિલ્લા કલેકટર કચેરીએ ટ્રાફિક શાખાએ 53 વાહનચાલકો પાસેથી હેલ્મેટ પહેર્યા વગર પ્રવેશ કરતાં હાજર દંડ વસૂલ્યો હતો.જે કામગીરી આજે બીજા દિવસે પણ ચાલુ રાખવામાં આવી હતી.

આજે ટ્રાફિક શાખા દ્વારા પીજીવીસીએલની લાલ બંગલા કચેરી તેમજ સાત રસ્તા પાસેની વીજ કચેરીમાં ટ્રાફિકની ટિમ દ્વારા વિશેષ ઝુંબેશ ચલાવવામાં આવી હતી. જામનગરની લાલ બંગલા સ્થિત વીજ કચેરીના પ્રવેશ દ્વાર પર સવારે 10.00 વાગ્યાથી ટ્રાફિક શાખાની ટુકડી તહેનાતમાં રહી હતી, અને વિજ કચેરીમાં પ્રવેશ કરનારા સરકારી કર્મચારીઓ, કે જેઓ હેલ્મેટ પહેર્યા વિના પ્રવેશ મેળવી રહ્યા હતા, તેવા 24 વીજ કર્મચારીઓને અટકાવીને દંડકીય કાર્યવાહી કરવામાં આવી હતી.

 તે જ રીતે સાતરસ્તા પાસે આવેલી વીજ કચેરીમાં પણ ટ્રાફિક શાખાની બીજી ટુકડી તહેનાતમાં હતી, અને 20 થી વધુ સરકારી વિજ કર્મચારીઓ હેલ્મેટ પહેર્યા વિના પ્રવેશતાં દંડાયા હતા, અને ટ્રાફિક શાખાની ટીમ દ્વારા તેઓ સામે સ્થળ પર જ દંડકીય કાર્યવાહી કરવામાં આવી હતી. જેને લઈને સરકારી કર્મચારીઓમાં ભારે હલચલ મચી ગઈ હતી. 

જોકે આગમચેતીના ભાગરૂપે કેટલાક સરકારી કર્મચારીઓ હેલ્મેટ પહેરીને પ્રવેશ્યા હતા, જેઓને ટ્રાફિક શાખા દ્વારા અંદર જવા દેવામાં આવ્યા હતા અને બાકીના અન્ય કર્મચારીઓ દંડાયા હતા.