દક્ષિણ ગુજરાતમાં મેઘતાંડવ: ઉમરપાડામાં 6 કલાકમાં સાડા 10 ઈંચ વરસાદ, જળબંબાકારની સ્થિતિ

Heavy Rain In South Gujarat: દક્ષિણ ગુજરાતમાં આજે (10મી સપ્ટેમ્બર) વરસાદે ફરી જોર પકડ્યું છે. હવામાન વિભાગની આગાહી વચ્ચે સુરતના ઉમરપાડામાં છેલ્લા 6 કલાકમાં ઉમરપાડામાં 10 ઈંચ વરસાદ વરસતા જનજીવન અસ્તવ્યસ્ત થઈ ગયું છે. મોટા ભાગના વિસ્તારોમાં ઠેર ઠેર પાણી ભરાઈ ગયા છે. આ સાથે જ દક્ષિણ ગુજરાતના નર્મદા, તાપી અને નવસારી સહિતના જિલ્લાઓમાં વરસાદ નોંધાયો છે. 

ગત 6 કલાકમાં રાજ્યના 65 તાલુકામાં વરસાદ વરસ્યો છે. 12 તાલુકામાં 1 ઈંચથી વધુ વરસાદ ખાબક્યો છે જ્યારે ઉમરપાડામાં સૌથી વધુ 10 ઈંચ વરસાદ વરસ્યો છે. સાગબારા અને ખેરગામમાં પોણા 3 ઈંચ અને ડેડિયાપાડામાં 2 ઈંચ વરસાદ નોંધાયો છે. તો બીજી તરફ બારડોલી અને કુકરમુંડામાં દોઢ ઈંચ વરસાદ ખાબક્યો છે.

આ વર્ષે મેઘકહેરના લીધે અનેક જિલ્લાઓમાં અતિવૃષ્ટિની સ્થિતિ સર્જાઇ છે, સ્થાનિકો જાનમાલને તથા ખેડૂતોના પાકને ભારે નુકસાન થયું છે. જોકે ભારે વરસાદના લીધે ઉમરપાડામાં ગંભીર સ્થિતિ સર્જાઇ છે, 10 ઇંચ જેટલો વરસાદ તૂટી પડતાં જનજીવન અસ્ત-વ્યસ્ત થઇ ગયું છે. નીચાણવાળા વિસ્તારોમાં ઠેર ઠેર પાણી ભરાયા છે. રસ્તાઓ પણ જાણે નદી વહી રહી હોય એવા દ્રશ્યો જોવા મળી રહ્યા છે. 

ઉમરપાડામાં ભારે વરસાદના લીધે વીરા અને મધુબન નદીમાં પાણીની આવક થઇ છે. આસપાસના ગામોને જોડાતા અનેક કોઝ-વે પર પાણીમાં મગ્ન બની ગયા છે. ચારણી ગામના લૉ લેવલ બ્રિજ પણ પાણીમાં ગરકાવ થયો છે. પિનપુરથી દેવઘાટ જતા રસ્તા પર પાણી ફરી વળ્યા છે. કોતરના પાણી રસ્તા પર ભરાતા લોકોને હાલાકી થઇ રહી છે.

વીરા નદીમાં ઘોડાપૂરની સ્થિતિ સર્જાઇ

ઉમરપાડામાં ભારે વરસાદના કારણે નીચાણવાળા વિસ્તારોમાં પાણી ભરાયા છે. રસ્તા પર નદીઓ વહેતી હોય તેવા દ્રશ્યો સર્જાયા છે.  ઉમરગોટથી સેલમ્બાના લો લેવલ કોઝ વે પર પાણી ફરી વળતાં વાહન વ્યવહાર બંધ થયો છે. રસ્તા બ્લોક થતાં જનજીવન પર માઠી અસર થઇ છે. ઉમરપાડાની વીરા નદીમાં ઘોડાપૂરની સ્થિતિ સર્જાઇ છે. મહુંવન અને વીરા નદીમાં પાણીની ભરપૂર આવક થતાં ચારણી ગામના લો લેવલ બ્રિજ પણ પાણીમાં ગરકાવ થઇ ગયો છે.

આ પણ વાંચો: આજે ફરી થશે મેઘતાંડવ: ગુજરાત, મહારાષ્ટ્ર સહિત 21 રાજ્યોમાં ભારેથી અતિભારે વરસાદની આગાહી

નવસારી જિલ્લામાં વરસાદના વિરામ બાદ આજે ફરી વરસાદી માહોલ જોવા મળ્યો છે. વહેલી સવારથી નવસારીના ગણદેવી, બીલીમોરા અને ચીખલીમાં ભારે પવન સાથે ધોધમાર વરસાદ શરૂ થયો છે. જેના કારણે સમગ્ર વિસ્તારમાં વરસાદી માહોલ જામ્યો છે.

વલસાડ જિલ્લામાં સૌથી વઘુ 108 ઈંચ, 117 તાલુકામાં 40 ઈંચથી વઘુ : ખેરગામમાં 135 ઈંચ 

આ વખતે અત્યાર સુધી 117 તાલુકામાં 40 ઈંચથી વઘુ, 114 તાલુકામાં 20 થી 40 ઈંચ, 20 તાલુકામાં 10 થી 20 ઈંચ જેટલો વરસાદ નોંધાયો છે. તાલુકા પ્રમાણે નવસારીના ખેરગામમાં સૌથી વઘુ 135 ઈંચ વરસાદ પડી ચૂક્યો છે. 

રીજિયન પ્રમાણે જોવામાં આવે તો કચ્છમાં 35 ઈંચ સાથે સરેરાશ 183.32%,  ઉત્તર ગુજરાતમાં 30.35 ઈંચ સાથે સિઝનનો 105.63%, પૂર્વ મઘ્ય ગુજરાતમાં 37.64 ઈંચ સાથે સરેરાશ 118%, સૌરાષ્ટ્રમાં 37.46 ઈંચ સાથે સરેરાશ 129% જ્યારે દક્ષિણ ગુજરાતમાં 73.01 ઈંચ સાથે સરેરાશ 124.30% વરસાદ નોંધાયો છે. 

ગુજરાતના જે જિલ્લામાં આ વખતે 100 ટકાથી વઘુ વરસાદ વરસી ચૂક્યો છે તેમાં ભરૂચ, નર્મદા, તાપી, સુરત, નવસારી, વલસાડ, ડાંગ, રાજકોટ, મોરબી, જામનગર, દેવભૂમિ દ્વારકા, પોરબંદર, જૂનાગઢ, અમદાવાદ, ખેડા, આણંદ, વડોદરા, છોટા ઉદેપુર, પંચમહાલ, મહીસાગર, દાહોદ, પાટણ, કચ્છ, મહેસાણા, સાબરકાંઠા, અરવલ્લી, ગાંધીનગરનો સમાવેશ થાય છે. 

હવામાન વિભાગની આગાહી

હવામાન વિભાગની આગાહી અનુસાર, અરવલ્લી, મહીસાગર, દાહોદ, પંચમહાલ, છોટા ઉદેપુર, નર્મદામાં ભારે વરસાદ પડી શકે છે. આ ઉપરાંત કચ્છ, મોરબી, સુરેન્દ્રનગર, જામનગર, દેવભૂમિ દ્વારકા, પોરબંદર, રાજકોટ, જૂનાગઢ, ગીર સોમનાથ, અમરેલી, ભાવનગર, બોટાદ, અમદાવાદ, ગાંધીનગર, મહેસાણા, પાટણ, બનાસકાંઠા, સાબરકાંઠા, ખેડા, આણંદ, વડોદરા, ભરૂચ, સુરત, તાપી, ડાંગ, નવસારી, વલસાડમાં હળવોથી મધ્યમ વરસાદ થવાની શક્યતા છે. 11મી સપ્ટેબરે દાહોદ, પંચમહાલ, વડોદરા અને છોટા ઉદેપુરમાં છુટાછવાયો વરસાદ પડી શકે છે.