સુરેન્દ્રનગર નજીક હાઇવે પર ગોઝારો અકસ્માત, ટ્રકની પાછળ કાર ઘૂસી જતાં 3 લોકો મૃત્યુ પામ્યા

Surendranagar Accident news | અમદાવાદથી રાજકોટ તરફ જતાં રોડ પર અવારનવાર અકસ્માતની ઘટનાઓ સામે આવી રહી છે ત્યારે સુરેન્દ્રનગર નજીક ફરી એકવાર ગોઝારો અકસ્માત સર્જાયો છે. માહિતી અનુસાર સુરેન્દ્રનગરથી ધ્રાંગધ્રા-માલવણ તરફ જતાં હાઈવે પર કાર અને ટ્રક વચ્ચે ભયંકર અકસ્માત સર્જાતા ત્રણ લોકોના કમકમાટી ભર્યા મૃત્યુ થયા હતા. પોલીસે આ મામલે કેસ નોંધ્યા બાદ ઘટનાસ્થળે પહોંચી તપાસ હાથ ધરી હતી. મૃતકોની ઓળખ વસીમ ખાન, સાહિલખાન અને હજરત ખાન કારેલિયા તરીકે થઇ હતી. 

કેવી રીતે થયો અકસ્માત 

મળતી માહિતી અનુસાર ધ્રાંગધ્રા માલવણ હાઈવે પર આ ગોઝારી દુર્ઘટના ત્યારે થઇ જ્યારે એક ટ્રકની પાછળ કાર ઘૂસી ગઇ હતી. અકસ્માત એટલો ભીષણ હતો કે બે યુવાનો તો ઓન ધ સ્પોટ જ મૃત્યુ પામી ગયા હતા. જ્યારે અન્ય એકને સારવાર માટે હોસ્પિટલ ખસેડાયો હતો. પોલીસના જણાવ્યાનુસાર મૃતકોના મૃતદેહોને પોસ્ટમોર્ટમ માટે સરકારી હોસ્પિટલમાં મોકલી દેવાયા હતા. 

અગાઉ પર સુરેન્દ્રનગરમાં અનેકવાર થયા છે ગમખ્વાર અકસ્માત 

થોડા દિવસ પહેલા જ સુરેન્દ્રનગર નજીક જ એક કાર પલટી ખાઈ જતાં ટ્રક સાથે ભટકાઈ હતી જેમાં 4 લોકો માર્યા ગયા હતા જ્યારે 2 ઘવાયા હતા. એ સમયે પણ અકસ્માત એટલો ભયાનક હતો કે 4 લોકો તો ઘટનાસ્થળે જ મૃત્યુ પામી ગયા હતા.