અંકલેશ્વર GIDCમાં મોટી દુર્ઘટના, કંપનીમાં રાસાયણિક પ્રક્રિયા વખતે બ્લાસ્ટ થતા 4નાં મોત
Updated: Dec 3rd, 2024
Ankleshwar GIDC: ભરૂચની અંકલેશ્વર GIDCમાં મોટી દુર્ઘટના સર્જાઈ છે જેમાં ચાર લોકોનાં મોત થયા છે. મળતી માહિતી અનુસાર, ડેટોક્સ ઈન્ડિયા કંપનીમાં રાસાયણિક પ્રક્રિયા દરમિયાન ભયાનક બ્લાસ્ટ થયો હતો. આ ઘટનામાં ચારનાં મોત થયાના અહેવાલ છે. પોલીસ અને ફેક્ટરી ઈન્સપેક્ટરની ટીમે સમગ્ર મામલે તપાસ શરૂ કરી છે.
પ્રાથમિક માહિતી અનુસાર, અંકલેશ્વર GIDCમાં ડેટોક્સ ઈન્ડિયા નામની કંપનીમાં રાસાયણિક પ્રક્રિયા ચાલી રહી હતી. આ દરમિયાન જ સ્ટીમ પ્રેશર પાઈપ ફાટી હતી. જેના કારણે નજીમાં કામ કરી રહેલા કર્મચારીઓને ગંભીર ઈજા થતા તેમનું ઘટનાસ્થળે જ મૃત્યુ થયું હતું. ઘટના બાદ ફેક્ટરી ઈન્સપેક્ટરની ટીમે પણ સ્થળ પર પહોંચી બ્લાસ્ટના કારણ અંગે તપાસ શરૂ કરી છે. આ દરમિયાન એવા સવાલો ઊઠવા લાગ્યા છે કે અનેકવાર આવી ઘટનાઓ બનતી હોય છે ત્યારે સુરક્ષાના ધોરણોને ધ્યાનમાં કેમ રાખવામાં આવતા નથી. વહીવટીતંત્ર આ મામલે કોઇ કડક કાર્યવાહી કેમ નથી કરતું? કે જેથી કરીને શ્રમિકોના જીવ બચાવી શકાય.
મનસુખ વસાવાએ ઘટાના અંગે દુ:ખ વ્યક્ત કર્યું
ભરુચના ભાજપ સાંસદ મનસુખ વસાવાએ ઘટાના અંગે દુ:ખ વ્યક્ત કર્યું છે. GPCBના અધિકારીઓ પણ આ ઘટના માટે દોષિત હોવાનો વસાવાએ આરોપ લગાવ્યો છે. આ ઉપરાંત કંપની સામે કાયદેસરની કાર્યવાહી કરવા કલેક્ટરને સૂચના આપી છે. તેમણે ડિટોક્સ કંપની અગાઉ પણ બેદરકારી સામે આવી ચૂકી છે. તેમણે GPCBના અધિકારીઓ પણ આ ઘટના માટે દોષિત હોવાનો આરોપ લગાવ્યો છે.
